Заснавальніца беларускай IT-кампаніі атрымала страшэнныя траўмы на гарналыжным курорце ў Грузіі
Наталля Міхнавец сутыкнулася з іншым лыжнікам, і праз высокую хуткасць пашкоджанні аказаліся амаль фатальнымі.
Няшчасце з CEO і заснавальніцай тэхналагічнага прадукту AINA Tech Наталляй Міхнавец здарылася 8 студзеня на грузінскім гарналыжным курорце Гудауры.
Падчас спуску на трасе Наталля сутыкнулася з іншым лыжнікам.
Хуткасць была вельмі высокая — настолькі, што цела страціла кантроль над траекторыяй, а ўдар адкінуў яе за межы трасы ў драўляную агароджу, праз якую Наталля ўпала на камяні.
Траўмы закранулі ўсё цела: твар, хрыбетнік і канечнасці.
У выніку аварыі Наталля атрымала надзвычай цяжкія, множныя траўмы: адкрыты падвертэльны пералом правай сцягнавой косткі, пералом рукі са зрушэннем, пералом хрыбетніка, множныя цяжкія пераломы твару (верхняй і ніжняй сківіцы, скулавай косткі, носа, вачніцы), страсенне мозгу, выбітыя амаль усе зубы і скразны разрыў шчакі. Усё гэта суправаджалася масіўнай стратай крыві.
Восем гадзін Наталля заставалася ў прытомнасці. Яна доўгі час ляжала адна на снезе, з невыносным болем і працяглай стратай крыві.
Пазней дактары казалі, што рызыка смерці ад болевага шоку была надзвычай высокай.
Не было ўпэўненасці, што Наталля дажыве да прыезду рэанімацыі — машыну чакалі каля 5 гадзін.
Калі ратавальнікі ўсё ж прыбылі, яны вагаліся, ці варта тэрмінова везці яе ў бальніцу, задаючы пытанні пра страхоўку і аплату. Толькі бліжэй да апоўначы Наталлю даставілі ў шпіталь.
У Грузіі Наталля правяла 9 дзён у рэанімацыі. Дактары змагаліся за яе жыццё, стабілізавалі стан і праводзілі экстранныя аперацыі на назе і руцэ.
Знаходзячыся ў рэанімацыі, Наталля заразілася мультырэзістэнтнымі шпітальнымі бактэрыямі — інфекцыяй, устойлівай да большасці антыбіётыкаў.
Гэта заражэнне рэзка ўскладніла лячэнне, запаволіла гаенне і значна павялічыла рызыкі.
Праз шматлікія і надзвычай складаныя траўмы твару было прынята рашэнне шукаць клініку ў Германіі.
У Германію Наталлю эвакуявалі на прыватным медыцынскім самалёце, абсталяваным для перавозкі пацыентаў у цяжкім стане.
Ужо ў Германіі дактары правялі васьмігадзінную надзвычай складаную аперацыю на твары, фактычна збіраючы яго нанова. Цяпер Наталля знаходзіцца і будзе знаходзіцца бліжэйшы месяц у клініцы Берліна Unfallkrankenhaus Berlin Rettungsstelle.
Яе чакаюць яшчэ некалькі аперацый.
Сябры Наталлі збіраюць грошы на дапамогу ёй. Для гэтага стварылі сайт з яе гісторыяй і рэквізітамі.
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць44
Каментары