Падчас Супербоўла на стадыёне ў жывым эфіры згулялі вяселле. Уладальнік «Грэмі» Bad Bunny выступіў сведкам і зарэгістраваў шлюб
Выступ Bad Bunny Трамп назваў самым жахлівым за гісторыю.
Фінал Нацыянальнай футбольнай лігі (Супербоўл) не проста галоўная спартыўная падзея ў ЗША, але і шоу з самай вялікай аўдыторыяй. 30 секунд рэкламы каштуюць мільёны даляраў.
Яго кульмінацыя — музычны выступ у перапынку матча. Гэтым разам за яго адказваў пуэртарыканскі рэпер Bad Bunny, які тыдзень таму ўзяў «Грэмі» за найлепшы альбом года (усе песні, дарэчы, на іспанскай).
Выступ Bad Bunny працягваўся 13 хвілін. І прыкладна на пятай хвіліне гледачы ўбачылі вяселле ў дэкарацыях пуэртарыканскай плошчы.
Можна было падумаць, што гэта частка шоу (у цэлым так і ёсць), — але вяселле было сапраўднае.
Малады і маладая, чые імёны не раскрываюцца, запрасілі Bad Bunny на сваё вяселле. Ён жа ў адказ прапанаваў ім замест гэтага стаць часткай свайго выступу на Супербоўле і ўзяць шлюб проста там.
У выніку ў моманце, які трапіў у кадр, святар абвясціў пару мужам і жонкай, пасля чаго яны пацалаваліся і пачалі танцаваць з гасцямі побач з гіганцкім тортам.
Сам Bad Bunny выступіў сведкам і падпісаў іх пасведчанне аб шлюбе. Таксама падчас вяселля праспявала і станчыла з Bad Bunny Лэдзі Гага (у блакітнай сукенцы). Таксама выступіў яшчэ адзін вядомы пуэртарыканец — Рыкі Марцін.
Выступ Bad Bunny меў выразны палітычны складнік. Падчас перфомансу была складаная сцэнаграфія, якая ўключала імітацыю плантацыі цукровага трыснягу і пуэртарыканскага жылога квартала.
У канцы рэпер, які часта крытыкуе Трампа за міграцыйную палітыку, сказаў: «Божа, блаславі Амерыку», пералічыўшы разам з ЗША і іншыя краіны кантынента — Канаду, Пуэрта-Рыка, Аргенціну, Мексіку, Уругвай, Парагвай. На білбордзе за яго спінай падчас выступлення быў надпіс: «Адзінае, што мацнейшае за нянавісць — гэта каханне».
Трамп назваў выступ «Дрэннага трусіка» вельмі кепскім.
«Шоу ў перапынку Супербоўла — гэта абсалютны жах, адно з найгоршых за ЎСЮ ГІСТОРЫЮ! У ім няма ніякага сэнсу, гэта абраза велічы Амерыкі, яно не адпавядае нашым стандартам поспеху, крэатыўнасці або перавагі», — напісаў ён у сацсетцы Truth Social.
Супербоўл прайшоў 8 лютага (у Мінску была ноч) у Санта-Клары (Каліфорнія). Матч выйграў «Сіэтл Сіхокс», які перамог «Нью-Інглэнд Пэтрыётс» з лікам 26:13.
Super Bowl 2026 стане самай дарагой трансляцыяй у гісторыі. Эль Фанінг будзе рэкламаваць маянэз, Лэдзі Гага — чыпсы, а Эма Стоўн будзе плакаць
Прэзентаваны ролік з Эмай Стоўн да «Супербоўла». Лаўрэатка «Оскара» ў ім псіхуе і ламае ноўтбукі
«Сіэтл Сіхокс» выйграў Супербоўл-2026
Bad Bunny выйграў «Грэмі» за найлепшы альбом года
Каментары