«Яны існуюць, але я іх не бачыў»: Барак Абама зноў падагрэў цікавасць да іншапланецян.
У незмушанай гутарцы ў падкасце No Lie з ютуб-зоркай Браянам Тайлерам Коэнам 44‑га прэзідэнта Злучаных Штатаў спыталі: «Іншапланецяне рэальныя?» Абама ўсміхнуўся — і адказаў: «Яны існуюць, але я іх не бачыў», піша Bild.
Адкуль ён ведае, што іншапланецяне існуюць, калі сам іх не бачыў, Абама не патлумачыў.
Гэтыя словы Абамы прагучалі ў межах серыі хуткіх пытанняў. На наступнае пытанне пра Зону 51 ён адказаў больш канкрэтна і з відавочнай іроніяй: «Падземнай базы няма — калі толькі не існуе гіганцкая змова, якую хаваюць нават ад прэзідэнта Злучаных Штатаў».
Але на гэтым тэма пазаземных стварэнняў не скончылася: Коэн хацеў даведацца, на якое пытанне Абама запатрабаваў адказу ў пачатку свайго прэзідэнцтва ў першую чаргу. Смеючыся, Абама адказаў: «Дзе іншапланецяне?»
Міф пра Зону 51
З 1950‑х гадоў у ЗША ўпарта цыркулююць чуткі, што на вайсковай базе Зона 51 у штаце Невада захоўваюцца НЛА, якія пацярпелі крушэнне, а таксама вядуцца строга сакрэтныя даследаванні і зваротны тэхнічны аналіз.
Прыхільнікі тэорый змовы мяркуюць, што там ёсць тайныя ангары, лабараторыі з пазаземнымі тэхналогіямі і навукоўцы, якія працуюць над суперзброяй, тэлепартацыяй і падарожжамі ў часе.
У 2021 годзе ў адным ток-шоу Абама ўжо прызнаваў, што адразу пасля ўступлення на пасаду пацікавіўся, ці існуе дзе-небудзь сакрэтная лабараторыя з пазаземнымі аб'ектамі. Адказ тады быў адназначным: не. Аднак ён таксама пацвердзіў, што існуюць відэа і фатаграфіі аб'ектаў у небе, рухі якіх не паддаюцца простаму тлумачэнню.
Каментары