У Мінску адбыліся масавыя затрыманні выдаўцоў і кнігараспаўсюднікаў
Па інфармацыі «Нашай Нівы», сілавікі ў аўторак-сераду 17—18 лютага прыйшлі да інтэлігенцыі.
Ператрусы і затрыманні былі не адзінкавымі і не выпадковымі, а сістэмнымі, спланаванымі. У некаторых сем'ях затрымалі па некалькі чалавек. Пры ператрусах ва ўсіх прысутных у кватэрах і офісах правяралі тэлефоны.
Прыходзілі як да супрацоўнікаў дзейных, так і да раней закрытых выдавецтваў; як да кіраўнікоў выдавецтваў, так і да звычайных супрацоўнікаў. А таксама да прадпрымальнікаў, якія займаюцца распаўсюдам кніжнай прадукцыі. Усе затрыманыя маюць вялікія заслугі перад беларускай культурай.
Што канкрэтна шукалі, пакуль незразумела. Найбліжэйшыя некалькі тыдняў пакажуць, ці гэта была проста акцыя застрашвання — і тады пераслед абмяжуецца адміністратыўнымі арыштамі, — ці сілавікі маюць намер завесці крымінальныя справы.
Раней, у мінулыя месяцы, арышты прайшлі ў некалькіх іншых асяродках рознага тыпу ў сталіцы і рэгіёнах. Мяркуючы з той інфармацыі, якая даходзіць, там шукалі доказы фінансавання з фондаў салідарнасці або сувязі з беларусамі замежжа.
Выдавецтва «Тэхналогія» прыпыніла працу. Паведамленне пра гэта з'явіліся ў яго фэйсбуку. «З пэўных прычын выдавецтва «Тэхналогія» не працуе», — гаворыцца ў акаўнце. Больш ніякіх тлумачэнняў у допісе няма.
10 лютага пасля імклівай хваробы памёр 44‑гадовы кнігавыдавец і кніганоша Раман Цымбераў — адзін з апошніх на гэтым полі.
За пяць дзён да таго яму раптоўна стала кепска, з’явіліся праблемы з ныркамі. Пасля здарыўся інсульт. Яго перавялі ў рэанімацыю, але не ўратавалі. Ягоная смерць выклікала ў сацыяльных сетках лавіну спачування і выказванняў любові і павагі да зробленага ім.
Масавыя рэпрэсіі ў Беларусі працягваюцца з 2020 года. Тады Аляксандр Лукашэнка прайграў Святлане Ціханоўскай, але не аддаў ёй улады, а змусіў яе выехаць за мяжу. Гэта выклікала масавыя народныя пратэсты, у якіх удзельнічалі мільёны людзей. У адказ на гэта ўлады распачалі палітычныя рэпрэсіі. Сотні тысяч беларусаў былі вымушаныя пакінуць краіну, яшчэ сотні тысяч трапілі ў рознага тыпу «чорныя спісы» на звальненне ці абмежаванне правоў. Каля 150 тысяч сталі ахвярамі крымінальнага і адміністрацыйнага пераследу. Асабліва цяжкі ўдар быў нанесены па сферы культуры.
«Наша Нiва» — бастыён беларушчыны
ПАДТРЫМАЦЬ
Дзядок расказаў, як паводзіў бы сябе ў сённяшняй Беларусі і што будзе далей5
Каментары