Ананімнасці ў сеціве больш няма: ШІ знаходзіць рэальных людзей за хвіліны
Штучны інтэлект цяпер можа раскрываць асобы людзей, якія хаваюцца пад псеўданімамі ў інтэрнэце, за лічаныя хвіліны і ўсяго за некалькі даляраў, піша Devby.io.
Да такой высновы прыйшлі даследчыкі са Швейцарскай вышэйшай тэхнічнай школы Цюрыха і Anthropic. Навукоўцы паказалі, што сучасныя ШІ-мадэлі здольныя аўтаматычна супастаўляць ананімныя профілі з рэальнымі людзьмі, выкарыстоўваючы толькі тэксты паведамленняў без структураваных звестак, накшталт табліц або рэйтынгаў.
Калі раней для такіх расследаванняў патрабаваліся гадзіны ручной працы, то цяпер ШІ робіць гэта ў цалкам аўтаматычным рэжыме.
У адным з эксперыментаў даследчыкі ўзялі 338 карыстальнікаў партала Hacker News, якія раней самі давалі спасылкі на свае профілі ў LinkedIn. З апісанняў выдалілі імёны і прамыя спасылкі. Пасля гэтага ШІ-агенту далі толькі безасабовыя тэксты публікацый і даручылі знайсці рэальную асобу ўладальніка акаўнта. Мадэль правільна супаставіла 226 профіляў з 338 пры дакладнасці каля 90%. Іншымі словамі, пераважная большасць спроб выявіць профіль была правільнай.
Сістэма працуе паэтапна: моўная мадэль аналізуе паведамленні і здабывае з іх прыкметы — прафесію, месца жыхарства, інтарэсы і іншыя дэталі. На аснове гэтых звестак фармуецца профіль, які аўтаматычна супастаўляецца з магчымымі кандыдатамі ў адкрытых крыніцах. Затым мадэль правярае найбольш верагодныя супадзенні і ацэньвае ўзровень упэўненасці ў выніку.
Асобна даследчыкі праверылі метад на публічных інтэрв’ю вучоных аб выкарыстанні ШІ ў іх працы. Нягледзячы на частковую рэдактуру тэкстаў, агент змог вызначыць асобы як мінімум 9 з 33 удзельнікаў з высокай дакладнасцю.
Даследчыкі звяртаюць увагу, што праблема не ў тым, што ШІ «разумнейшы» за чалавека-расследчыка. Мадэль выкарыстоўвае тыя ж ускосныя прыкметы: згадкі пра ўніверсітэт, праект, горад, хобі. Розніца ў хуткасці і цане, бо тое, што раней патрабавала значных намаганняў і таму выкарыстоўвалася рэдка, цяпер можна маштабаваць.
Аўтары папярэджваюць, што гэта змяняе базавыя ўяўленні пра ананімнасць у інтэрнэце. З іх слоў, «практычная схаванасць», на якую разлічвалі карыстальнікі — перакананне, што іх тэарэтычна можна раскрыць, але ніхто не стане гэтым займацца — больш не працуе. Магчымыя наступствы прымянення такога інструмента, паказваюць даследчыкі, надзвычай шырокія: ад пераследу актывістаў і журналістаў да масавага таргетаванага махлярства.
Цяпер чытаюць
Галоўная рэдактарка гомельскай раёнкі пакаялася за тое, што абвінаваціла гурт «Дразды»11
Каментары