Самалёт-помнік Су-7Б, які больш за 40 гадоў быў адной з адметнасцяў мікрараёна Сцяпянка ў Мінску, накіравалі на рэстаўрацыю. Пра гэта паведамілі ў адміністрацыі Партызанскага раёна сталіцы.
Спецыялісты ўжо пачалі рамонтна-аднаўленчыя работы манумента, які знаходзіцца на вуліцы Карвата. Самалёт перавезлі на Мінскі завод цывільнай авіяцыі № 407, дзе і будзе праходзіць рэстаўрацыя.
Плануецца абнавіць не толькі сам самалёт, але і падмурак помніка, а таксама ўпарадкаваць прылеглую тэрыторыю. Раённыя ўлады запэўніваюць, што пасля заканчэння работ абноўлены рэактыўны знішчальнік-бамбавік вернецца на сваё месца.
Самалёт Су-7Б паставілі ў Сцяпянцы ў сярэдзіне 1980‑х гадоў, калі там знаходзіўся вайсковы гарадок. Баявую машыну тады даставілі з аэрадрома Бабровічы ў Гомельскай вобласці. Першапачаткова самалёт меў бартавы нумар 77. Пасля перайменавання галоўнай вуліцы ў гонар падпалкоўніка Уладзіміра Карвата нумар змянілі на 29 — у памяць пра самалёт, на якім першы ўладальнік ганаровага звання Герой Беларусі загінуў 23 мая 1996 года.
Каментары