На Валыні сем машын зладзілі пагоню за аўтамабілем вайскоўцаў і сілай адбілі прызыўніка
Адзін супрацоўнік ТЦК падчас нападу атрымаў траўму галавы, яшчэ адзін паранены шклом. Прызыўнік уцёк.
У Валынскай вобласці Украіны 8 сакавіка паблізу вёскі Возера адбылася сапраўдная пагоня з нападам на супрацоўнікаў тэрытарыяльнага цэнтра камплектавання (ТЦК).
Як паведамляе прэс-служба Валынскага ТЦК, група везла ваеннаабавязанага жыхара Запарожжа да месца прызыву, калі іх службовы аўтамабіль пачала праследаваць калона з сямі цывільных машын.
Нападнікі дзейнічалі жорстка: яны блакавалі рух, падрэзалі спецтранспарт — той вылецеў у кювет.
Пасля спынення нападнікі разбілі шкло ў службовым аўто, каб сілай вызваліць прызыўніка.
У выніку сутычкі адзін з супрацоўнікаў ТЦК атрымаў траўму галавы, яшчэ адзін паранены асколкамі шкла. Адбіты ў вайскоўцаў мужчына ўцёк разам з групай падтрымкі. Яго месцазнаходжанне цяпер невядомае.
Каментары
Няхай ідуць дзеці дэпутатаў за неньку лесапасадкі штурмуюць.