«Можа хопіць вату качаць?» «Белорусский силовик» атакуе «партыю міру» ў кіраўніцтве Расіі
Канал, створаны беларускім ГУБАЗіКам, патрабуе вайны да пераможнага канца. Ён сцвярджае, што вядзенне перамоў дэматывуе расіян. І пусціў дроцік у канкрэтнага чалавека ў атачэнні Пуціна.
«На жаль, проста на вачах узмацняецца раскол у расійскім прадзяржаўным лагеры, — напісаў сёння канал «Белорусский силовик» у пасце, адрасаваным расійскай аўдыторыі, і патлумачыў. — Немагчыма і нармальна ваяваць, і адначасова весці перамовы».
Канал, створаны Артурам Гайко, адзначае нарастанне расколу ў расійскім грамадстве: «Гэта можна назіраць нават у каментарыях ва ўсіх каналах, дзе асвятляецца тэма баявых дзеянняў. Ты літаральна заходзіш туды, і ў кожным пасце — узаемныя абвінавачванні».
«Белорусский силовик» атакуе тых людзей у кіраўніцтве Расіі, якія выступаюць за перамовы, і канкрэтна намякае на гендырэктара Расійскага фонду прамых інвестыцый Кірыла Дзмітрыева:
«Можа хопіць вату качаць? Падбіраць словы, каб не пакрыўдзіць «паважаных партнёраў», угаворваць, шукаць магчымасці злятаць у Маямі, каб пакатацца на бордзе. Іран, які мае ў разы менш магчымасцяў, прадэманстраваў, што праціўнік разумее толькі сілу і лічыцца будзе толькі з ёй.
У нейкі момант прыйдзецца зрабіць выбар: хто табе даражэйшы — свае ці чужыя?»
Крык душы Артура Гайко знайшоў водгук у асяродку расійскіх ваенкараў. Яго перапосцілі шматлікія іншыя каналы.
«Праціўнік разумее толькі сілу і лічыцца будзе толькі з ёй», — гэтыя словы акцэнтуе канал «Два маёры».
Вайна стала залатой жылай не толькі для расійскага ВПК, але і для прапагандысцкага апарата. Яе спыненне, адмова Масквы ад курсу на распальванне і супрацьстаянне, будзе азначаць і змяншэнне фінансавання шавіністычнага кантэнту, у тым ліку і ваенкараў, якія да 2022 года не адыгрывалі вялікай ролі ў расійскай інфапрасторы. Для многіх з іх працяг вайны — гэта яшчэ і захаванне ўласнай значнасці.
У той жа час у расійскім грамадстве нарастае стома ад бясконцага канфлікту, які Аляксандр Лукашэнка ў 2025 годзе назваў «цягамоцінай, якую трэба сканчаць». Расія страціла ад 300 да 350 тысяч чалавек забітымі. Яшчэ прыкладна столькі ж засталіся інвалідамі. Большасць захопленых Расіяй населеных пунктаў сцёртыя дашчэнту пры захопе. Паток добраахвотнікаў у расійскую армію перасох, расіяне вытрацілі запасы вайсковай тэхнікі.
Тым не менш перамовы аб спыненні вайны ідуць туга, бо Расія хоча дадатковых тэрытарыяльных саступак. Рост цэнаў на энерганосьбіты ў выніку атакі ЗША і Ізраіля на Іран даў Маскве надзею на рост даходаў. З гэтым можа быць звязанае і ажыўленне «партыі вайны», што была ўжо і заклякшы.
Рыторыка «Белорусского силовика» пярэчыць публічнай рыторыцы самога Аляксандра Лукашэнкі, які на словах выступае за мір тут і зараз.
Раней «Белорусский силовик» мачуліў улады Расіі і за спыненне ўдараў па ўкраінскай энергетыцы. «Трывожныя навіны паступаюць», — так пачыналася першае паведамленне канала пра мараторый на ўдары.
Тэлеграм-канал «Белорусский силовик» узнік у сакавіку 2022 года, калі расіяне штурмавалі Кіеў. Дзякуючы калабарацыям з такімі ж расійскімі Z-каналамі і распальванню ваеннай істэрыі ён узляцеў да 437 тысяч падпісчыкаў — беларусаў сярод іх мала, ён працуе на ўнутрырасійскую аўдыторыю. «Наша Ніва» пайшла па слядах, пакінутых яго стваральнікам у інтэрнэце, і высветліла раней, што за каналам стаіць Артур Гайко, афіцэр ГУБАЗіКа Міністэрства ўнутраных спраў Беларусі.
Цяжка сказаць, наколькі вялікая частка беларускіх сілавікоў цалкам ідэнтыфікуюць сябе з Расіяй і кіруюцца такімі чалавеканенавісцкімі ідэямі, як аўтары «Белорусского силовика». Аднак відавочна, што гэтая частка мае картбланш для дзеяння і прапаганды сваёй рускамірнай, фактычна русафашысцкай ідэалогіі.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне13
Каментары
[Зрэдагавана]