Тураператары на фоне ўзмацнення жорсткасці візавай палітыкі краін Еўропы фіксуюць значнае скарачэнне выдачы шматразовых шэнгенскіх віз расійскім турыстам сёлета, піша Асацыяцыя тураператараў Расіі.
У студзені — сакавіку 2026 года колькасць выдадзеных шматразовых віз скарацілася не менш чым на 90% у параўнанні з аналагічным перыядам 2025 года. Некаторыя тураператары распавялі, што ў гэтым годзе практычна не атрымлівалі мультывіз для сваіх кліентаў.
«У параўнанні са студзенем-сакавіком 2025 года выдача шматразовых віз скарацілася на 99%», — распавялі ў адной з кампаній.
Па даных тураператараў, замест шматразовых віз расійскім турыстам у 50-60% выпадкаў выдаюць двухразовыя візы — «пераважна пад круізы». Такая практыка ёсць у консульстваў Італіі, Францыі, Іспаніі і Грэцыі.
У большасці выпадкаў расійскім турыстам, якія плануюць паездкі ў Еўропу, варта арыентавацца на аднаразовыя візы пад тэрміны паездкі, адзначаецца ў публікацыі АТАР.
Пры гэтым з пачатку 2026 года тураператары фіксуюць рост колькасці зваротаў па шэнгенскія візы ў параўнанні з першым кварталам 2025 года. Напрыклад, у Space Travel зафіксавалі рост гэтага паказчыка на 20-25%.
У PAC Group распавялі, што ў два разы павялічылася колькасць запытаў на атрыманне віз у Іспанію і Францыю, на 30-40% — у Італію, на 10% — у Грэцыю і Венгрыю. У лістападзе 2025 года Еўракамісія абвясціла аб прыпыненні выдачы грамадзянам РФ шматразовых шэнгенскіх віз.
У паведамленні ЕК гаварылася, што расейцам «давядзецца падаваць заяву на новую візу кожны раз, калі яны плануюць паездку ў ЕС».
Каментары