Высадзяць 50 тысяч руж і адкрыюць новыя зоны адпачынку: як зменіцца сталіца ў 2026 годзе

— Вясной мы высадзім каля 10 тысяч дрэў і каля 50 тысяч кустарнікаў, а затым працягнем гэтую працу восенню, — распавядае намеснік генеральнага дырэктара па добраўпарадкаванні і ўтрыманні аб’ектаў зялёнай гаспадаркі «Мінскзелянбуда» Кацярына Кароткіна. — Якімі будуць выніковыя лічбы, пакуль сказаць не магу, паколькі яны могуць карэктавацца пасля веснавых аглядаў зялёных насаджэнняў. Калі пачнуць распускацца лісцікі, мы ўбачым, як перанеслі зіму дрэвы і кустарнікі, і тады пачнём распрацоўваць планы на восень. У прынцыпе, сёлетняя снежная зіма для раслін спрыяльная. Але ці спраўдзіліся нашы чаканні, высветліцца пазней.

Горад забудоўваецца, і неабходна азеляняць новыя кварталы, а таксама выконваць кампенсацыйныя пасадкі ўзамен старых і хворых дрэў, высечаных у месцах, адведзеных пад будаўніцтва. У апошнім выпадку мы імкнёмся высаджваць новыя дрэвы ў тых раёнах, дзе яны былі знесены, і толькі ў выключных выпадках на іншых тэрыторыях.

У гэтым годзе ў Мінску высадзяць 50 000 руж разнастайнай афарбоўкі — кустовых і мініяцюрных. Прычым гэтая лічба не ўваходзіць у агульную колькасць запланаваных да пасадкі кустарнікаў. Ружы з’явяцца ва ўсіх кутках сталіцы: саджанцы падзеляць пароўну — па 5 000 кожнаму раёну і 5 000 «Мінскзелянбуду».

Яшчэ адна паўсядзённая праца «Мінскзелянбуда» і раённых прадпрыемстваў — догляд газонаў. Недзе іх вытоптваюць, недзе трава пакутуе ад супрацьгалалёдных рэагентаў. Некаторыя ўчасткі работнікі зялёнага будаўніцтва ратуюць падкормкамі, а дзе-нідзе патрабуюцца падсыпка новага грунту і пасеў травы.

Паркі і бульвары

Паводле інфармацыі «Мінскзелянбуда», за прадпрыемствамі сістэмы замацаваны 34 паркі і лесапаркі, 160 сквераў, 28 бульвараў. Штогод там высаджваюць кветкі, падкормліваюць існуючыя зялёныя насаджэнні, сочаць за станам малых архітэктурных формаў, лесвіц, дарожак.

— Ствараюцца і новыя паркі, — кажа Кароткіна. — Напрыклад, парк Народнага адзінства плануецца адкрыць ужо ў гэтым годзе. Вядзецца праца і ў парку імя Уга Чавеса. Гэта будзе тэрыторыя спартыўнай скіраванасці: лыжаролерная траса, каток пад адкрытым небам, дзіцячае і спартыўнае абсталяванне. І вядома ж, дрэвы, кусты і кветкі. Дарэчы, тут плануюць высадзіць каля 1 000 руж. Праца па стварэнні новых зон адпачынку працягнецца ў гэтым годзе.

Як і раней, будзе адкрыта не менш за дзве лакацыі ў кожным раёне сталіцы — да Дня Незалежнасці і Дня горада.

Малыя архітэктурныя формы

— Новыя праекты ландшафтных кампазіцый і малых архітэктурных формаў мы распрацоўваем штогод, — удакладняе Кароткіна. — У апошнія гады ўсё часцей выкарыстоўваецца вертыкальнае азеляненне, пры якім у высокія бетонныя формы высаджваюць дрэвы, кусты, шматгадовыя расліны. Такая альтэрнатыва традыцыйнаму азеляненню дазваляе раслінам не так моцна адчуваць уплыў антыгалалёдных рэагентаў у зімовы час. У гэтым годзе хочам зрабіць гэта ў Міхайлаўскім скверы. Акрамя гэтага, плануем яшчэ адзін цікавы праект, калі на адзінай тэрыторыі будуць скампанаваны больш за 200 малых архітэктурных формаў, у якія высадзяць самыя розныя віды раслін. У цэнтры пляцоўкі ўсталююць лаўкі, магчыма, гандлёвыя аб’екты. Гэты праект пакуль дапрацоўваецца.

Дарогі

Тэрыторыя ўздоўж МКАД і чыгунак знаходзіцца ў падпарадкаванні розных арганізацый. Гэта «Мінскзелянбуд», адміністрацыі раёнаў, Мінская гарадская лесапаркавая гаспадарка і лясгас Мінскай вобласці.

— Што тычыцца тэрыторыі ўздоўж Мінскай кальцавой аўтадарогі, пра азеляненне якой у апошнія гады гаварылася нямала, то сёння мы імкнёмся саджаць там ясені і елкі калючыя. Быў перыяд, калі папулярнасцю карысталася елка звычайная, але гэтая расліна ўсё ж лясная, і мы заўважылі, што яна дрэнна прыжываецца на адкрытай мясцовасці, — тлумачыць Кароткіна. — Таму сёння высаджваем тыя віды дрэў, якія лепш адаптуюцца. І назіранні паказваюць, што іх прыжывальнасць на прыдарожных участках добрая — захоўваюцца 97—98 % саджанцаў.

Пляжы

За прадпрыемствамі, што ўваходзяць у структуру «Мінскзелянбуда», замацавана 23 пляжы, размешчаныя як у межах горада, так і за яго паза межамі. Штогод напярэдадні купальнага сезона там праводзяць афарбоўку і рамонт існуючага абсталявання, устаноўку новага, абнаўленне малых архітэктурных формаў. Дадаюцца новыя лежакі, кантэйнерныя пляцоўкі, дзіцячае гульнявое і спартыўнае абсталяванне. Падсыпаецца пяском берагавая лінія, рамантуюцца пад’езды да пляжаў і парковачныя месцы. 

• 3
• 0
• 1
• 0
• 0
• 0
• 0
• 0