Трамп заявіў пра ўнікальнае выратаванне абодвух пілотаў F-15 з глыбіні іранскай тэрыторыі
Прэзідэнт ЗША Дональд Трамп абвясціў пра завяршэнне надзвычай складанай пошукава-ратавальнай аперацыі ў іранскіх горах. Паводле яго слоў, амерыканскім вайскоўцам удалося вярнуць абодвух пілотаў знішчальніка, збітага ў мінулую пятніцу. Гэтую падзею Трамп назваў гістарычнай перамогай амерыканскай зброі.
Трамп паведаміў у сваёй сацсетцы Truth, што другі пілот ужо знаходзіцца ў бяспецы. Раней інфармацыя пра лёс экіпажа трымалася ў сакрэце, каб не сарваць місію, дадаў ён.
Паводле прэзідэнта ЗША, гэта першы выпадак у вайсковай гісторыі, калі двух пілотаў удалося выратаваць паасобку з глыбокага тылу праціўніка.
Са слоў Трампа, у выратавальнай аперацыі ўдзельнічалі «дзясяткі самалётаў, узброеных самай смяротнай зброяй у свеце». Пілот жывы, хоць і атрымаў траўмы, заявіў Трамп.
Ён адзначыў, што вайскоўцы суткамі сачылі за перамяшчэннем пілота, пакуль іранскія сілы спрабавалі яго высачыць у цяжкадаступных гарах. Ніводзін амерыканскі вайсковец не загінуў і не атрымаў ранення падчас абедзвюх аперацый.
Свой допіс Трамп скончыў віншаваннем з Вялікаднем і напамінам, што ЗША «ніколі не пакідаюць сваіх байцоў».
Афіцыйны Тэгеран пакуль не каментуе заявы пра працу амерыканскай авіяцыі ў глыбіні сваёй тэрыторыі.
Учора паведамлялася, што ЗША вядуць пошукі другога пілота F-15, збітага над Іранам 3 красавіка. Іран, у сваю чаргу, аб’явіў узнагароду ў 60 тысяч долараў за захоп «варожага лётчыка».
Каментары
С ПЗРК его сбили, а не при помощи ПВО.