Сябар Пуціна прыбраў Япрынцава з прэзідыума Міжнароднай федэрацыі самба
Уладзімір Япрынцаў, беларускі бізнэсмен, спартсмен і скандальны экс-партнёр Юрыя Чыжа, з 27 сакавіка больш не ўваходзіць у выканаўчы камітэт Міжнароднай федэрацыі самба (FIAS), у якім быў з 2015 года. Рашэнне аформлена подпісам Васіля Шастакова — расійскага дзюдаіста, спарынг-партнёра Уладзіміра Пуціна.
Інфармацыя пра змены ў выканаўчым камітэце арганізацыі апублікавана ў Швейцарскім гандлёвым рэестры — FIAS зарэгістраваны ў Лазане.
З 27 сакавіка (а фактычна — яшчэ 3 снежня 2025 года) з членаў камітэта выведзены васьмёра чалавек: генеральны сакратар Раберта Ферарыс (Італія, яго подпіс ануляваны), Амар Лапера Тамаё (Калумбія), Сезар Артэага Варгас (Венесуэла), Набуюкі Асаі (Японія), Анна Карчагіна, Мун Чон Кым (Паўднёвая Карэя), Таццяна Трывіч (Сербія) і ўласна Уладзімір Япрынцаў.
Адначасова ўзмоцнены паўнамоцтвы віцэ-прэзідэнта FIAS Аламжона Мулаева з Узбекістана — ён атрымаў права калектыўнага подпісу разам з прэзідэнтам.
Як афіцыйна адхіленыя ад удзелу ў арганізацыі, Раберта Ферарыс (які называе Расію сваёй другой радзімай) і Уладзімір Япрынцаў займелі на сайце FIAS асобную старонку, дзе іх падпісалі як «ганаровых членаў».
Уладзімір Япрынцаў уваходзіў у прэзідыум FIAS з лістапада 2014 года.
Расіянін Васіль Шастакоў застаўся прэзідэнтам FIAS.
***
Уладзімір Япрынцаў нарадзіўся ў 1961 годзе ў Ашхабадзе. Прыехаў у Мінск паступаць у Інстытут фізкультуры. Быў шматразовым чэмпіёнам СССР, Еўропы і свету па самба, заслужаным майстрам спорту СССР.
У 2013 годзе журналісты ставілі Япрынцава на 19‑е месца ў рэйтынгу самых багатых і ўплывовых бізнэсменаў Беларусі. Траекторыя Япрынцава пайшла ўніз у сярэдзіне 2010-х, калі ён год правёў у СІЗА КДБ, пасля чаго атрымаў штраф і быў вызвалены.
Цяпер чытаюць
Колькасць ахвяр выбуху ў маскоўскім элітным рэстаране на юбілеі генерала, які камандаваў наступам на Кіеў з Беларусі ў 2022-м, вырасла да пяці чалавек33
Каментары