Тэхнарэйв у Белавежскай пушчы перанеслі на больш позні тэрмін. Першапачаткова мерапрыемства планавалася правесці 18 красавіка, аднак пазней аператар продажу білетаў абвясціў пра змену даты, піша Tochka.by.
Цяпер івэнт запланаваны на 28 жніўня. Афіцыйных падрабязных тлумачэнняў пераносу арганізатары не далі, але можна меркаваць, што на гэта паўплывала пазіцыя абаронцаў прыроды, занепакоеных тым, што мерапрыемства праводзіцца тады, калі ў звяроў нараджаюцца дзіцяняты, а птушкі выседжваюць яйкі.
Паведамляецца, што ўсе ўжо набытыя білеты застаюцца сапраўднымі. Калі ж наведвальнікі не захочуць ісці на мерапрыемства на новую дату, ім абяцаюць поўнае вяртанне грошай, за выключэннем сэрвіснага збору.
Мерапрыемства павінна было прайсці ў рэзідэнцыі Дзеда Мароза ў Белавежскай пушчы. Планавалася, што тэрыторыя на адзін вечар ператворыцца ў пляцоўку электроннай музыкі з выступамі дыджэяў, святлом, фуд-кортамі і дадатковымі актыўнасцямі, уключаючы прагулкі па тэрыторыі.
Пасля анансавання ідэі вакол івэнту ўзнікла дыскусія. Частка людзей выказвала занепакоенасць тым, як гучная музыка можа паўплываць на жывёл у нацыянальным парку. У адказ арганізатары і адміністрацыя сцвярджалі, што пляцоўка знаходзіцца дастаткова далёка ад запаведнай зоны, а гук будзе накіраваны ў бок сцэны, каб мінімізаваць уздзеянне на прыроду.
Цяпер чытаюць
Як рыхтаваўся візіт Ціханоўскай у Кіеў і чаму ён некалькі разоў пераносіўся2
Каментары