Упершыню з пачатку вайны ўкраінскія беспілотнікі дасягнулі Екацярынбурга. Раніцай 25 красавіка горад падвергся атацы дронаў, паведаміў губернатар Свярдлоўскай вобласці Дзяніс Паслер.
Адзін з беспілотнікаў трапіў у жылы шматпавярховік у цэнтры горада. У выніку пашкоджаныя кватэры на верхніх паверхах, выбіты вокны, частка фасада і абломкі разляцеліся вакол будынка. Паводле афіцыйных дадзеных, шэсць чалавек звярнуліся па медыцынскую дапамогу з лёгкім атручваннем прадуктамі гарэння, адна жанчына была шпіталізаваная. Жыхароў дома эвакуявалі.
Сведкі паведамляюць пра моцны выбух, пасля якога з’явіўся чорны дым і полымя на верхніх паверхах. Пры гэтым папярэджанняў пра небяспеку, як сцвярджаецца, не было.
Адзначаецца, што побач з пашкоджаным домам няма відавочных вайсковых аб’ектаў. Аднак непадалёк знаходзяцца адміністрацыйныя і сілавыя будынкі, а таксама прадпрыемства «Вектар», якое ўваходзіць у абаронны канцэрн «Алмаз-Антэй» і займаецца вайсковай сувяззю. Паводле некаторых звестак, менавіта яно магло быць магчымай цэллю атакі.
Екацярынбург знаходзіцца больш чым за 2000 кіламетраў ад украінскай мяжы, таму гэты ўдар стаў адным з самых далёкіх. Пасля інцыдэнту жыхары скардзіліся на праблемы з інтэрнэтам і затрымкі авіярэйсаў. Аэрапорт горада часова закрывалі.
У той жа дзень атакі беспілотнікаў былі зафіксаваныя і ў Чалябінскай вобласці, але там абышлося без ахвяр і разбурэнняў. Расійскае Міністэрства абароны заявіла, што ноччу сістэмы супрацьпаветранай абароны знішчылі больш за сотню дронаў у розных рэгіёнах краіны.
Каментары