Брытанская газета The Sunday Times з дапамогай эксперта і камп’ютарных праграм пацвердзіла выпадак канібалізму ў расійскай арміі. Раней пра гэта паведамляла ўкраінская ваенная разведка, піша «Агенцтва».
Гэты выпадак стаў вядомы дзякуючы размове афіцэра і лейтэнанта Уладзіслава Разікава, намесніка камандзіра 5‑й асобнай гвардзейскай мотастралковай брыгады. Перахопы перадала ўкраінская разведка.
Вайскоўцы размаўлялі ў Telegram у лістападзе 2025 года побач з Мірнаградам у Данецкай вобласці. Заўважанага ў канібалізме называюць па пазыўным Храмы, ён служыў у 95‑м палку 5‑й брыгады.
Неназваны афіцэр распавядае пра «інцыдэнт».
«Карацей, адзін наш забіў двух іншых, і ён паспрабаваў… ён адрэзаў нагу і ўжо спрабаваў з’есці», — кажа афіцэр. Затым ён апісвае, як Храмога знайшлі двое вайскоўцаў, якіх адправілі расследаваць яго адсутнасць.
«У рэшце рэшт, сёння яны пайшлі і знайшлі месца, дзе ён зацягнуў іх у падвал, адрэзаў нагу і ўжо сядзеў там, пракручваючы праз мясарубку ці нешта ў гэтым родзе, у спробе з’есці… Ён адкрыў агонь. Яны забілі яго», — кажа афіцэр.
Афіцэр таксама адправіў Разікаву фатаграфіі нагі і знясіленага салдата. Згодна з аналізам The Sunday Times, фатаграфіі не былі згенераваныя або адрэдагаваныя з дапамогай ШІ.
Незалежны ваенны хірург патлумачыў выданню, што малаверагодна, што раненні, якія бачныя на фотаздымках, атрыманы ў выніку ваенных дзеянняў. «Гэта выглядае так, нібыта гэта было адрэзана з дапамогай вострага нажа», — сказаў хірург.
На фатаграфіі цела Храмога бачна, што ён моцна знясілены.
Атрымаўшы здымак, Разікаў перапытаў: «Іх не кормяць ці што? Я не разумею». Афіцэр адказаў, што «нашы хутка пачнуць есці адзін аднаго» і што «ўсе сядзяць на галодных пайках».
Разікаў удзельнічае ва ўварванні як мінімум з пачатку 2023 года, пра што сведчаць даныя выцечак баз даных.
Пракрамлёўскія СМІ згадвалі яго як намесніка камандзіра 5‑й асобнай гвардзейскай мотастралковай брыгады імя Аляксандра Захарчанкі 51‑й агульнавайсковай арміі ў складзе групоўкі войскаў «Цэнтр». У ліпені 2025 года ён распавядаў ТАСС пра ўкраінскіх разведчыкаў у Мікалаеўцы, у кастрычніку таго ж года — пра захоп пасёлка Маскоўскае ў ДНР.
The Sunday Times распавядае яшчэ пра тры перахопленыя паведамленні расійскіх вайскоўцаў, у якіх абмяркоўваліся выпадкі канібалізму.
У размове ад 3 красавіка 2025 года салдат з пазыўным Мост з 54‑га матарызаванага стралковага палка скардзіцца свайму афіцэру. «Калі б ён быў чалавекам, то ён мог бы застацца так доўга, як ён захоча, але ён еў труп, чалавечае мяса. Я мусульманін. Я не хачу, каб хтосьці накшталт яго заходзіў да мяне ў хованку», — кажа вайсковец.
У іншай размове 8 кастрычніка 2025 года камандзір 1437‑га матарызаванага стралковага палка вінаваціць аднаго са сваіх падначаленых. «Чаму ты, бл…, ясі хахлоў? Спыніся, бл…, есці людзей», — прыводзіць The Sunday Times яго цытату.
У яшчэ адным паведамленні ў Telegram украінскія хакеры знайшлі загад 55‑му матарызаванаму стралковаму палку: «Ніякага алкаголю! Ніякіх наркотыкаў! Ніякіх перасоўванняў без дакументаў! Ніякага канібалізму!».
У снежні 2025 года Галоўнае ўпраўленне разведкі Мінабароны Украіны апублікавала запіс, на якім чуваць як мужчына кажа, што гатовы забіць «кагосьці маладога». «Я нажы натачыў, мне ўсё адно, каго рэзаць, жэрці хачу», — казаў чалавек.
Улетку ГУР апублікаваў запіс перамоў пра тое, што вайсковец з пазыўным Брэлок забіў і з’еў напарніка. «Брэлок яго заваліў, а потым еў нах*й два тыдні», — кажа мужчына на запісе.
Пасольства Расіі ў Лондане заявіла выданню, што не бачыць «падстаў для каментарыяў». Прадстаўнік сказаў: «Тое, што вы апісалі, — гэта выдумкі, прадастаўленыя ўкраінскай ваеннай разведкай — арганізацыяй, функцыя якой заключаецца ў вытворчасці прапаганды, а не ў зборы фактаў».
Каментары