Яшчэ ўчора бананы былі роўна-жоўтыя, а сёння ўжо пакрыліся цёмнымі плямамі і змяклі. Аднак просты кухонны трук можа падоўжыць ім жыццё яшчэ на некалькі дзён.
Спецыялісты сцвярджаюць: бананы псуюцца праз этылен — газ-гармон, які яны самі ж і выпрацоўваюць падчас паспявання. Менавіта таму банан часта падкладаюць у пакет да цвёрдай хурмы, авакада ці манга, каб тыя хутчэй даспелі. Але для саміх бананаў гэта стварае замкнёнае кола: чым больш яны спеюць, тым больш этылену выдзяляюць, а чым больш газу вакол — тым хутчэй ідзе далейшае паспяванне. Як толькі адзін плод у звязцы пачынае цямнець, астатнія імгненна «падцягваюцца» за ім.
Пра ролю этылену добра ведаюць пастаўшчыкі. Яны закупляюць гэту садавіну ў краінах-вытворцах, дзе яе зрываюць яшчэ зусім зялёнай і цвёрдай, як камень. Перад тым, як завезці бананы ў крамы, іх змяшчаюць у спецыяльныя камеры і апрацоўваюць этыленам, каб «абудзіць» банан і запусціць працэс паспявання.
Чаму варта выкарыстоўваць кручок?
Галоўнае правіла доўгага захавання — бананы павінны добра праветрывацца. Як распавёў The New York Times Дэніэл Барабіна, кіраўнік буйной амерыканскай кампаніі Top Banana, этылен крыху лягчэйшы за паветра. Калі бананы ляжаць у місцы або шчыльна прыціснутыя адзін да аднаго, газ канцэнтруецца вакол іх і паскарае працэс гніення.
Таму лепш за ўсё падвешваць бананы на спецыяльны трымальнік або звычайны кухонны кручок. Калі звязка вісіць у паветры, этылен хутчэй рассейваецца, і садавіна застаецца свежай на некалькі дзён даўжэй.
Падвешванне мае яшчэ адзін плюс: бананы менш мнуцца. Нават калі на лупіне няма відавочных плям, мякаць унутры можа быць пашкоджана ад ціску ўласнай вагі. А любое пашкоджанне запускае «рэакцыю на рану», і банан пачынае выпрацоўваць яшчэ больш газу. Таму старайцеся не кідаць іх і не прыціскаць іншымі прадуктамі ў сумцы.
Але небяспечныя не толькі ўдары. Калі звязку адразаюць ад асноўнага сцябла, на «кароне» (месцы злучэння пладоў) утвараецца сур’ёзная рана, якая таксама выпускае этылен. Спецыялісты раяць: каб падоўжыць «тэрмін прыдатнасці» хвосцік гронкі варта шчыльна заматаць харчовай плёнкай. Гэта дапамагае запаволіць распаўсюджванне газу.
І апошняе: ніколі не кладзіце бананы ў халадзільнік. Гэта трапічная садавіна, яна баіцца холаду. Нізкая тэмпература прыводзіць да хуткага акіслення: лупіна чарнее, а мякаць стане друзлай. Ідэальныя ўмовы для бананаў — звычайная пакаёвая тэмпература (ад +14 да +24 °C).
Цяпер чытаюць
Калеснікава: У 2020‑м я змагалася не супраць Лукашэнкі, а за людзей, свабоду і свабодныя выбары72
Калеснікава: У 2020‑м я змагалася не супраць Лукашэнкі, а за людзей, свабоду і свабодныя выбары
Фядута рэзка адказаў Калеснікавай: За што вы змагаліся ў 2020 годзе, не цікавіць нікога, акрамя мядзведзяў з берлінскага заапарка, якія вас атачаюць3030
Каментары
Ці мо хто ў прамысловых маштабах набывае? Прынёс гронку, з'еў за колькі дзён і ўсё...
І навошта баяцца пацямнелых бананаў? Яны ж толькі мякчэйшыя і саладзейшыя становяцца. І не ведаю, да якой чарнаты іх трэба давесці, каб яны зусім непрыдатныя сталі...
А рэчаiснасць iншая: дроны, Буча, калабаранты, смерць.
Як жа хочацца спакою. Без пуйлоу, без фенцыкау, без дронау, без усёй гэтай свалаты ... яблыкi, кiвi, бананы, мы едзем на адпачынак у украiнскую Cяргееуку ($100 з чалавека за месяц, гэта з харчаваннем), чарнiгауцы едуць да нас.
Ну, за што нам усё гэта? Толькi таму, што у якога-та там маленькага "напалеона" сдарыуся iмперскi здвiг у галаве?