Рубіа заявіў, што Куба прадстаўляе пагрозу для ЗША, Гавана абвінаваціла яго ў хлусні
Па словах дзяржсакратара ЗША, верагоднасць мірнага пагаднення з Кубай «невялікая», піша Бі-бі-сі.
Яго выказванні прагучалі ўсяго праз дзень пасля таго, як ЗША выставілі былому прэзідэнту Кубы Раулю Кастра абвінавачанне ў забойстве ў сувязі са збіццём двух самалётаў у 1996 годзе, у выніку якога загінулі грамадзяне ЗША.
Рубіа заявіў, што Вашынгтон аддае перавагу «дыпламатычнаму рашэнню», але папярэдзіў, што прэзідэнт Дональд Трамп мае права і абавязак абараняць сваю краіну ад любой пагрозы.
Міністр замежных спраў Кубы Бруна Радрыгес абвінаваціў Рубіа ў «хлусні» і заявіў, што востраў ніколі не ўяўляў пагрозы для ЗША.
У чацвер, выступаючы перад журналістамі, Рубіа заявіў, што дыпламатыя па-ранейшаму застаецца найбольш верагоднм рашэннем у адносінах з Кубай, але дадаў: «Шчыра кажучы, верагоднасць гэтага, улічваючы, з кім мы зараз маем справу, невялікая».
Ён таксама абвінаваціў Кубу ў тым, што яна з'яўляецца «адным з вядучых спонсараў тэрарызму ва ўсім рэгіёне», што Радрыгес катэгарычна абверг у сваім пасце ў X.
Міністр замежных спраў Кубы раскрытыкаваў Рубіа за спробу «справакаваць ваенную агрэсію» і абвінаваціў урад ЗША ў «бязлітасных і сістэматычных» атаках на яго краіну.
Куба пакутуе ад паліўнага крызісу, які пагоршыла нафтавая блакада ЗША, і знаходзіцца пад ціскам адміністрацыі Трампа з патрабаваннем заключыць здзелку.
У апошнія некалькі месяцаў грамадзяне краіны адчуваюць працяглыя адключэнні электраэнергіі і недахоп харчавання.
Рубіа заявіў, што краіна прыняла прапанову ЗША аб прадастаўленні гуманітарнай дапамогі ў памеры 100 мільёнаў долараў.
Трамп неаднаразова спрабаваў аказаць ціск на Кубу і адкрыта абмяркоўваў звяржэнне яе камуністычнага рэжыму.
Абвінавачанні, выстаўленыя былому кубінскаму прэзідэнту ў сераду, шмат каму нагадалі гісторыю з захопам амерыканцамі прэзідэнта Венесуэлы Нікаласа Мадура ў студзені.
На пытанне журналістаў аб тым, ці збіраецца яго ўрад — і як — даставіць Кастра ў ЗША для выстаўлення абвінавачанняў, Рубіа адказаў: «Я не збіраюся казаць пра тое, як мы збіраемся даставіць яго сюды. Калі б мы спрабавалі даставіць яго сюды, навошта б я стаў расказваць прэсе аб нашых планах?».
В.а. генеральнага пракурора Тод Бланш заявіў, што ЗША «чакаюць, што ён з'явіцца тут, па ўласнай волі ці іншым чынам».
Арышт Адыс Ластрэс Марэры
Пазней дзяржсакратар ЗША абвясціў пра арышт сястры кіраўніка кубінскага фінансавага кангламерату GAESA Адыс Ластрэс Марэры.
«Марэра кіравала нерухомасцю і жыла ў Фларыдзе, адначасова дапамагаючы камуністычнаму рэжыму Гаваны, пакуль я не пазбавіў яе статусу пастаяннага жыхара. Я рады паведаміць, што сёння яна была арыштаваная і зараз знаходзіцца пад вартай у іміграцыйнай і мытнай службе ЗША», — напісаў Рубіа ў X.
Ён адзначыў, што GAESA — фінансавы кангламерат, які кантралююць кубінскія вайскоўцы.
Міністэрства фінансаў ЗША ў 2020 годзе ўвяло санкцыі ў адносінах да кубінскага генерала Луіса Альберта Радрыгеса Лопеса-Кальехі, зяця былога кіраўніка краіны Рауля Кастра і кіраўніка GAESA.
У кансорцыум уваходзяць каля 50 гасцініц, сеткавыя крамы і будаўнічыя прадпрыемствы. GAESA таксама кантралюе буйны порт Марыэль, які знаходзіцца на захад ад Гаваны.
Раней, выступаючы перад журналістамі ў Авальным кабінеце, Трамп заявіў, што Куба — «недзеяздольная краіна», і што яго адміністрацыя спрабуе дапамагчы ім «на гуманітарнай аснове».
Ён сказаў, што амерыканцы кубінскага паходжання «хочуць вярнуцца ў сваю краіну» і дапамагчы Кубе дамагчыся поспеху.
«Іншыя прэзідэнты разглядалі гэтае пытанне 50‑60 гадоў і нешта прадпрымалі, і, здаецца, я буду тым, хто гэта зробіць, таму я з задавальненнем гэта зраблю», — сказаў Трамп.
Каментары