Пашынян паабяцаў фермерам выплаціць за ўраджай, які яны не змогуць паставіць у Расію
«Сёння мы знаходзімся на этапе стратэгічнага выбару».
Прэм’ер-міністр Арменіі Нікол Пашынян паабяцаў, што выплаціць фермерам кампенсацыі за ўраджай, які яны не змогуць паставіць у Расію з-за ўведзеных Масквой абмежаванняў.
«Сёння мы знаходзімся на этапе стратэгічнага выбару. Мы вырашаем пытанне нашай дзяржавы, рэспублікі і набыцця дзяржавай новай якасці. І я кажу: сапсуецца перац — я заплачу за гэты перац, урад заплаціць. Але ў выніку ўсяго гэтага вырасце і вытворчасць перцу ў Арменіі, і экспарт», — заявіў Нікол Пашынян.
Расія з 2 чэрвеня часова забараніла ўвоз у Расію шэрагу садавіны з Арменіі. Пад забарону трапілі: вішні, чарэшні, абрыкос, сліва, персік, нектарын, вінаград.
На мінулым тыдні была ўведзена забарона на клубніцы, зеляніну, агуркі, памідоры, перцы, некалькі марак каньяку і віна.
Адносіны паміж Расіяй і Арменіяй абвастрыліся на фоне таго, што Ерэван пачаў наладжваць сувязі з краінамі Захаду. Уладзімір Пуцін заяўляў, што ў выпадку, калі Арменія ўвойдзе ў склад Еўрасаюза, Масква «згорне» ўсю эканамічную інтэграцыю з Ерэванам і перастане закупляць тавары з Арменіі.
Таксама на саміце ў Астане 28 мая кіраўнікі Расіі, Беларусі, Казахстана і Кыргызстана запатрабавалі ад Арменіі правесці рэферэндум наконт выбару, ЕС або Еўраазіяцкая эканамічная супольнасць. Расія адклікала свайго пасла з Ерэвана.
7 чэрвеня ў Арменіі пройдуць парламенцкія выбары. Расія робіць стаўку на «Квітнеючую Арменію» Самвела Карапецяна і нібыта планавала завезці ў краіну падчас выбараў 100 тысяч армян, бо галасаванне з-за мяжы забаронена.
Цяпер чытаюць
«Паездкай мы задаволеныя, але сівых валасоў дадалося». Жыхарка Светлагорска адпачнула ў Геленджыку і дзеліцца эмоцыямі2
«Паездкай мы задаволеныя, але сівых валасоў дадалося». Жыхарка Светлагорска адпачнула ў Геленджыку і дзеліцца эмоцыямі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1414
Каментары