Як пасля выпіскі выглядае дзяўчынка, на якую напалі бяздомныя сабакі
Юную гамяльчанку, на якую ў пачатку мая напалі бадзяжныя сабакі, выпісалі з бальніцы. «Калі Ліда дома зняла адзенне, я адвярнулася і заплакала: проста не змагла на гэта глядзець», — кажа Юлія, мама дзяўчынкі. Яна паказала Onlíner фота, як зараз выглядае яе 11‑гадовая дачка, і распавяла, як сям’я спрабуе справіцца з наступствамі перажытага.
Здарэнне адбылося 8 мая ў лесапаласе побач з мікрараёнам Шведская Горка. Школьніца вярталася дадому па сцежцы, калі на яе напалі бяздомныя сабакі і літаральна пакусалі ўсё цела.
Дзяўчынку выратаваў мясцовы жыхар, які праязджаў непадалёк на матацыкле. Паводле яго слоў, сабакі былі буйнымі — каля 40 сантыметраў у карку.
Стан Ліды лекары ацэньвалі як «крайне цяжкі».
— Дзіця было ўсё скусанае, ад галавы да ног. Яе экстранна паднялі ў аперацыйную, — расказаў у эфіры «Беларусь 4» загадчык траўматалога-артапедычнага аддзялення Гомельскай абласной дзіцячай клінічнай бальніцы Аляксандр Віннік.
Мама дзяўчынкі распавяла Onlíner, што яе ўжо выпісалі з бальніцы.
— Калі дома Ліда зняла адзенне, я адвярнулася і заплакала: проста не змагла на гэта глядзець, — прызнаецца Юлія. — Галава, патыліца, спіна, ножкі — усё ў шнарах і ўкусах. Зараз лета, спёка і трэба думаць, як падабраць адзенне, каб усяго гэтага не было відаць: Ліда вельмі саромеецца шрамаў і моцна перажывае праз гэта.
Пасля выпіскі дзяўчынцы прызначылі змазваць швы і сляды ад укусаў спецыяльнай маззю, каб не было рубцоў.
— Мы ўчора ездзілі да хірурга, які прысутнічаў на момант яе паступлення ў бальніцу, — кажа Юлія. — Доктарка сказала, што дачка была ўся ірваная, што сабачыя іклы цудам не закранулі жыццёва важных артэрый. Добра, што Аляксандр яе своечасова заўважыў! Страшна падумаць, але сабакі проста маглі загрызці маё дзіця… Гэта проста цуд, што яе выратавалі.
Паводле слоў маці дзяўчынкі, зараз яны занепакоены эстэтычным пытаннем: як надалей візуальна мінімізаваць сляды ад укусаў і шнары.
— Яшчэ да трагедыі мы накупілі Лідзе летняга адзення, але яно ўсё адкрытае. Сталі нешта выбіраць для прагулкі — плача, саромеецца надзяваць, кажа, што будуць відаць шрамы. А што тут ёй прапанаваць, калі на ёй жывога месца няма? Адзінае, што ацалела — твар, — плача Юлія.
Пакуль сям’я шукае клінікі, якія з часам дапамогуць схаваць шнары і даць магчымасць дзяўчынцы адчуць сябе больш упэўнена.
— Вядома, Ліда яшчэ дзіця і хутка пераключаецца. Яна ходзіць на прагулкі, сустракаецца з сяброўкамі. Учора мы разам хадзілі на пляцоўку ў пяты мікрараён.
Дачку нечакана акружылі незнаёмыя мне дзеці, сталі яе падбадзёрваць. Аказалася — яе новыя сябры, якія даведаліся пра выпадак з TikTok. Гэта было так кранальна! Пяць гадоў таму не стала таты Ліды, а тут праз час такая бяда з ёй. Пасля нас падтрымала шмат людзей — і я ўсім вельмі за гэта ўдзячная.
Дапамагчы дзяўчынцы можна праз дабрачынны рахунак.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі62
Каментары
хаваць свежыя рубцы ад сонца трэба не праз сорам, а каб яны лепш загаіліся. каб менш заўважныя шкнары сфармаваліся. дактары хіба не казалі пра гэта? і сама мама не пацікавілася?
на жаль, рубцы будуць. тут трэба думаць, як дзяўчынку псіхалагічна падтрымаць. каб яна менш саромелася рубцоў.
тут сапраўды кранальна, што
"Дачку нечакана акружылі незнаёмыя мне дзеці, сталі яе падбадзёрваць. Аказалася — яе новыя сябры, якія даведаліся пра выпадак з TikTok. Гэта было так кранальна!"
хай і надалей ёй трапляюцца такія людзі