Сырскі лічыць, што расіяне будуць наступаць на Чарнігаўшчыну з Бранскай вобласці. А вось з Беларусі — наўрад ці
Галоўнакамандуючы Узброеных сіл Украіны Аляксандр Сырскі ў інтэрв'ю ўкраінскаму тэлеканалу ТСН заявіў, што, паводле ацэнкі ўкраінскага камандавання, расійскі Генеральны штаб падрыхтаваў некалькі варыянтаў новых наступальных дзеянняў супраць Украіны.
Паводле звестак Сырскага, найбольш верагодным сцэнарыем з'яўляецца наступленне з тэрыторыі Бранскай вобласці ў кірунку Чарнігаўскай вобласці. Паводле Сырскага, галоўная мэта такой аперацыі — не захоп Кіева, а расцягванне лініі фронту і прымушэнне Украіны перакінуць частку сваіх войскаў з іншых участкаў, дзе цяпер ідуць найбольш актыўныя баявыя дзеянні.
Ён таксама паведаміў, што ў Расіі разглядалі магчымасць правядзення наступальнай аперацыі з тэрыторыі Беларусі. Аднак, на яго думку, пасля апошніх падзей беларускія ўлады наўрад ці пагодзяцца зноў выкарыстаць сваю тэрыторыю як плацдарм для наступлення. Разам з тым украінскае камандаванне ўлічвае і такі варыянт развіцця падзей.
У апошнія месяцы Украіна ўзмацняе абарону сваёй паўночнай мяжы. На Палессі будуюцца новыя фартыфікацыйныя збудаванні і мінныя загароды. Раней прэзідэнт Украіны Уладзімір Зяленскі заяўляў, што неабходнасць дадатковага ўмацавання Чарнігаўскага і Кіеўскага напрамкаў звязаная з магчымым узмацненнем ціску Расіі на Аляксандра Лукашэнку, каб яшчэ глыбей уцягнуць Беларусь у вайну.
Некалькі дзён таму Аляксандр Сырскі паведаміў пра стварэнне новых падраздзяленняў беспілотных сістэм для прыкрыцця паўночнага напрамку. У сваю чаргу, камандуючы Нацыянальнай гвардыяй Украіны Аляксандр Піўненка адзначаў, што маштабнае расійскае наступленне на гэтым участку магчымае толькі ў выпадку канцэнтрацыі каля 70 тысяч вайскоўцаў каля мяжы. Пры гэтым ён падкрэсліў, што ўкраінскія сілы рыхтуюцца не дапусціць паўтарэння падзей пачатку 2022 года, калі тэрыторыя Беларусі выкарыстоўвалася для наступлення на Кіеў.
Цяпер чытаюць
Беларускія рэпетытары ў паніцы: праз праблемы «Яндэкса» яны могуць згубіць матэрыялы, якія напрацоўвалі гадамі10
Каментары