Фірма Modum захоўвала на складах Wildberries у Электрасталі і Катоўску траціну сваёй касметыкі
У мінулыя выхадныя два буйныя лагістычныя цэнтры Wildberries у Расіі пацярпелі з-за атакі беспілотнікаў. Гаворка пра склады ў падмаскоўнай Электрасталі і Катоўску ў Тамбоўскай вобласці. Выданне Office Life пагаварыла з некаторымі беларускімі бізнэсамі, якія закранула гэта сітуацыя.
Гэтымі лагістычнымі магутнасцямі карысталіся і беларускія селеры. Паводле ацэнак экспертаў, якія дапамагаюць у прасоўванні на маркетплэйсах, склад у Электрасталі (яго лічаць найбольш пацярпелым) быў папулярны ў беларускіх прадаўцоў. Напрыклад, ім актыўна карысталіся прадпрымальнікі з Брэста, а не так даўно транзіт на гэты склад наладзілі з Мінска, таму многія накіроўвалі свае тавары менавіта туды.
«Важна вярнуць даступнасць нашых тавараў для пакупнікоў»
На складах у Электрасталі і Катоўску знаходзілася каля 30% усяго таварнага запасу касметычнай кампаніі Modum, прызначанага для продажу праз маркетплэйс. Па стане на гэты момант гэты асартымент недаступны для замовы.
«Канчатковую суму шкоды зараз назваць немагчыма, — расказаў Office Life намеснік дырэктара па развіцці Modum Віктар Лабковіч. — Мы чакаем завяршэння інвентарызацыі і афіцыйнай інфармацыі ад Wildberries пра фактычны стан тавараў. Пасля гэтага зможам аб’ектыўна ацаніць суму страт і вызначыць далейшы парадак урэгулявання».
У Modum кажуць, што прыярытэтам з’яўляецца не толькі ацэнка страт, але і максімальна хуткае аднаўленне даступнасці прадукцыі для купцоў.
«Наша каманда загадзя дыверсіфікавала размяшчэнне тавараў паміж некалькімі складамі Wildberries, таму большая частка асартыменту працягвае прадавацца ў звычайным рэжыме. Таксама мы аператыўна перавялі частку пазіцый на схему FBS (дастаўка са склада прадаўца. — Заўв. рэд.), гэта дае магчымасць аднавіць продажы, не чакаючы аднаўлення працы пацярпелых лагістычных цэнтраў».
Паралельна фармуюцца дадатковыя пастаўкі на альтэрнатыўныя склады Wildberries, каб хутка аднавіць асартымент па найбольш запатрабаваных пазіцыях.
«Калі нейкая пазіцыя часова адсутнічае, рэкамендуем праверыць картку трохі пазней — асартымент паступова вяртаецца ў продаж па меры пераразмеркавання рэшткаў», — тлумачыць Віктар Лабковіч.
Wildberries ужо абвясціў пра падтрымку для партнёраў, якія пацярпелі з-за сітуацыі, што склалася. Як кажуць у Modum, маркетплэйс даваў ільготныя ўмовы для пераразмеркавання тавараў на іншыя склады, у тым ліку зніжкі на транзіт і часовае захоўванне. Гэта дазволіць значна паскорыць аднаўленне асартыменту.
«Страціла тавараў на 60 тысяч рублёў. Складана сказаць, што рабіць далей»
Прадпрымальніца з Брэста Кацярына ўжо пару гадоў прадае праз маркетплэйс тавары для жывёл.
«Паводле справаздачы Wildberries, 18 ліпеня ў лагістычным цэнтры ў Электрасталі ў нас заставалася 1742 адзінкі тавару. Сума шкоды склала 60 тысяч беларускіх рублёў, — расказала прадпрымальніца. — Раніцай маркетплэйс сам аўтаматычна зняў усе рэшткі з продажу. Апошняя замова была а 05:42. Пакупніку вернуць грошы на картку, калі ён адразу аплаціў. А калі тавар не аплачваў, то ён нічога і не страціць, проста не атрымае сваю замову».
Кацярына пакуль не моцна разлічвае на кампенсацыю, галоўнае пытанне для яе — што рабіць далей.
«Склад у Электрасталі быў цэнтральным, вельмі папулярным, з яго ажыццяўлялася хуткая дастаўка тавараў, — тлумачыць яна. — Магчыма, будзем адгружацца на іншыя склады, але трэба глядзець па сітуацыі. Напэўна, пакуль нам варта прадавацца са свайго склада або пачакаць нейкі час. Інакш страты для бізнэсу могуць быць вельмі вялікімі».
Падчас атакі БПЛА на склад Wildberries у Тамбоўскай вобласці пацярпеў беларус
Чаму Украіна ўдарыла па складах Wildberries і як усюдыісны маркетплэйс звязаны з расійскай арміяй
«Мая праца згарэла». Беларускія бізнэсы страцілі тавар на складах Wildberries, але маюць больш шанцаў на кампенсацыю, чым расіяне
Дым ад знішчанага складу Wildberries пад Масквой расцягнуўся на 250 кіламетраў
Пасля атакі па двух складах Wildberries маглі пацярпець да 15% складскіх плошчаў кампаніі
Каментары
И ведь кто-то может порадоваться.