Кіеў прапаноўваў перадаць затрыманую за шпіянаж беларуску Кардаш не толькі Мінску
Кіеў прапаноўваў абмяняць грамадзянку Беларусі Іну Кардаш, затрыманую сёлета ў студзені па падазрэнні ў шпіянажы на карысць Камітэту дзяржаўнай бяспекі Беларусі, не толькі Беларусі, але і Расіі, піша «Свабода».
Кіраўнік сакратарыяту Каардынацыйнага штабу Багдан Ахрыменка ў адказе на запыт «Свабоды» падкрэсліў, што ўкраінская дзяржава адкрытая да абмеркавання любых спосабаў вяртання ўкраінскіх грамадзян, пазбаўленых свабоды. У тым ліку гатовая да перадачы Расіі і Беларусі іх грамадзян, якіх ва Украіне абвінавачваюць у шпіянажы або якія ўжо адбываюць пакаранне паводле адпаведных артыкулаў Крымінальнага кодэксу краіны.
«І расійская ўлада, і ўлада Беларусі праінфармаваныя аб магчымасці і гатоўнасці Украіны да такога працэсу. Але не першыя, ні другія не спяшаюцца забіраць сваіх праваленых агентаў, пра што сведчыць статыстыка дзяржаўнага праекту «Хачу да сваіх», — адзначыў кіраўнік сакратарыяту Каардынацыйнага штабу ў пытаннях абыходжання з ваеннапалоннымі.
Багдан Ахрыменка ўдакладніў, што ў пералік праекту «Хачу да сваіх» уключылі больш за 400 прозвішчаў калабарантаў і шпіёнаў. Большасць з іх чакаюць такога абмену 6‑8 месяцаў, а ў некаторых выпадках — амаль два гады.
У той жа час прадстаўнік Каардынацыйнага штабу не адказаў на пытанне аб агульным ліку грамадзян Украіны, якія знаходзяцца ў турмах Беларусі і частку якіх перадавалі Кіеву разам з ваеннапалоннымі ці беларускімі палітвязнямі.
«У мэтах бяспекі ўсіх удзельнікаў працэсу мы не каментуем гэтае пытанне, паколькі гэта можа пашкодзіць арганізацыі будучых падобных захадаў», — падкрэсліў Багдан Ахрыменка.
Іну Кардаш затрымалі сёлета 21 студзеня і выставілі ёй падазрэнні ў шпіянажы на карысць Камітэту дзяржаўнай бяспекі Беларусі.
На момант затрымання Іна Кардаш ужо працавала ў Каардынацыйным штабе ў пытаннях абыходжання з ваеннапалоннымі Галоўнага ўпраўлення выведкі Міністэрства абароны Украіны.
Паводле следства, яна кантактавала з КДБ праз грамадзяніна Беларусі, які «ўсвядомлена для яе ажыццяўляў канфідэнцыйную супрацу з спецслужбамі Беларусі».
Дасудовае расследаванне яе справы закончылі. Пасля судовага разгляду абвінаваўчага акту на яго адпаведнасць украінскаму заканадаўству суд павінен пачаць разглядаць справу па сутнасці. Цяпер Іна Кардаш знаходзіцца ў Кіеўскім СІЗА.
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс15
Каментары
А на грамадзян Беларусі, якія абаранялі Украіну і цяпер знаходзяцца ў палоне, нам пофіг - дадаў Багдан Ахрыменка