Расія і Паўночная Карэя амаль дабудавалі першы аўтамабільны мост паміж краінамі
Дзякуючы новаму мосту паміж Расіяй і Паўночнай Карэяй упершыню стане магчымым прамы аўтамабільны рух. Афіцыйна ён прызначаны для развіцця гандлю і турызму, аднак даследчыкі лічаць, што насамрэч новая пераправа можа спрасціць ваенную лагістыку і зрабіць перавозку грузаў менш прыкметнай для спадарожнікавага назірання.
Мост праз раку Туманную (Туманган) злучыць расійскі пасёлак Хасан на Далёкім Усходзе і паўночнакарэйскі Туманган. Ён праходзіць побач з ужо існуючым чыгуначным «Мостам дружбы», які да гэтага часу быў адзінай сухапутнай пераправай паміж дзвюма дзяржавамі.
Мост мае даўжыню каля 1 км і шырыню сем метраў з дзвюма палосамі руху. Разам з пад'язнымі дарогамі ўвесь комплекс мае працягласць 4,7 км. Спадарожнікавыя здымкі таксама паказваюць будаўніцтва дапаможнай інфраструктуры на расійскім баку, у тым ліку верталётнай пляцоўкі.
Як піша The Guardian, Паўночная Карэя ўжо завяршыла сваю частку будаўніцтва, уключаючы мытныя і каранцінныя пункты. Адкрыццё планавалася на 19 чэрвеня, але расійскі бок не паспеў скончыць работы ў вызначаны тэрмін. Новую дату адкрыцця пакуль не абвясцілі.
Масква і Пхеньян не робяць сакрэту з гэтага праекта, заяўляючы, што ён накіраваны на пашырэнне гандлю і турызму. Міністр транспарту Расіі Андрэй Нікіцін казаў, што новая пераправа павінна павялічыць тавараабарот і спрыяць развіццю памежных тэрыторый. Дзяржаўнае агенцтва КНДР KCNA таксама паведамляла, што мост будзе садзейнічаць перамяшчэнню людзей, турызму і абмену таварамі.
Аднак новае расследаванне ўкраінскай праваабарончай групы Truth Hounds сведчыць пра тое, што мост прызначаны хутчэй для стварэння схаванага ваенна-лагістычнага калідора, чым для стымулявання эканомікі.
Паводле расследавання, эканамічная мэтазгоднасць праекта выглядае сумнеўнай. Паводле ацэнак даследчыкаў, будаўніцтва каштавала больш за 100 мільёнаў долараў, тады як аб'ём гандлю паміж Расіяй і КНДР у 2024 годзе складаў толькі каля 34 мільёнаў долараў.
Акрамя таго, турызм з Расіі ў Паўночную Карэю па-ранейшаму жорстка кантралюецца. Замежнікаў пускаюць пераважна ў складзе арганізаваных груп у суправаджэнні гідаў. У 2025 годзе краіну наведалі каля 10 тысяч расіян, прычым большасць з іх накіроўвалася ў Пхеньян, які знаходзіцца больш чым за 500 кіламетраў ад новага моста.
Аўтары расследавання мяркуюць, што мост перш за ўсё мае стратэгічнае значэнне. На іх думку, аўтамабільныя перавозкі значна цяжэй адсочваць са спадарожнікаў, чым чыгуначныя.
Тып вагона, які бачны на здымку, можа шмат расказаць пра груз. Пэўныя катэгорыі тавараў перавозяцца ў адкрытых вагонах, што дазваляе іх ідэнтыфікаваць. Грузавікі ж на спадарожнікавых здымках амаль заўсёды выглядаюць аднолькава, а пагрузку можна праводзіць у розных месцах, тады як цягнікі прывязаныя да некалькіх чыгуначных вузлоў.
Акрамя таго, загрузка і разгрузка грузавікоў можа адбывацца значна хутчэй, чым у выпадку з вагонамі, якія даўжэй знаходзяцца пад спадарожнікавым назіраннем.
Яшчэ адна перавага новага маршруту ў тым, што аўтамабільны транспарт не залежыць ад рознай шырыні чыгуначнай каляіны ў Расіі і КНДР. На чыгунцы вагоны патрабуюць замены колавых пар пры перасячэнні мяжы, а для грузавікоў такой праблемы няма.
Паводле Truth Hounds, новая дарога можа выкарыстоўвацца для перавозкі паўночнакарэйскіх вайскоўцаў, будаўнічых брыгад і службовых асоб у Расію, а таксама для паставак у КНДР расійскіх тэхналогій і іншых рэсурсаў.
Актыўнае будаўніцтва моста пачалося пасля падпісання ў чэрвені 2024 года пагаднення аб усеабдымным стратэгічным партнёрстве паміж Расіяй і КНДР. З таго часу, паводле адкрытых даных, Паўночная Карэя пачала пастаўляць войскі, артылерыйскія боепрыпасы і балістычныя ракеты для падтрымкі вайны Расіі ва Украіне.
Цяпер чытаюць
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»31
Каментары