Занядбаны стан могілак каля пасёлка Свіслач Пухавіцкага раёна выклікаў абурэнне мясцовых жыхароў: людзі скардзяцца на зараснікі, адсутнасць вады і смеццевых кантэйнераў. Аднак у камунальнай службе заяўляюць, што зоны адказнасці на могілках падзелены.
У рэдакцыю «Мінскай праўды» звярнулася жыхарка пасёлку Дружны Пухавіцкага раёна. Паводле яе слоў, за могілкамі паблізу гарадскога пасёлку Свіслач ніхто не сочыць.
Паводле слоў жанчыны, могілкі знаходзяцца ў запусценні.
«Мы іх у народзе завём Дукорскія. Колькі прасілі побач з могілкамі ўстанавіць кантэйнеры для смецця, паставіць калонку, каб людзі маглі памыць рукі ці помнікі — нічога не робяць. Як едзем на могілкі — пяцілітровую бутлю валачом з сабой. Мы ж не маладыя людзі! Нам цяжка! Сумнік расце — яго трэба або касіць, або труціць. Змеі водзяцца ў гэтай расліннасці — хадзіць страшна. Колькі будзем дабівацца парадку?!» — абураецца жанчына.
Дырэктар УП «Жылцепласэрвіс» КГ Пухавіцкага раёна Сяргей Хендогін растлумачыў, як размяжоўваюцца абавязкі па ўпарадкаванні.
Камунальныя службы адказваюць выключна за месцы агульнага карыстання. Камунальнікі абкошваюць асноўныя праходы і тэрыторыю вакол могілак, прыбіраюць сухія галіны ды вывозяць смецце з кантэйнераў.
Сваякі памерлых абавязаны даглядаць самі магілы і тэрыторыю вакол іх.
«За стан магілы адказваюць людзі, якія арганізавалі пахаванне або ўстаноўку помніка, — яны прызнаюцца фактычнымі ўладальнікамі ўчастка і абавязаны сачыць за яго ўтрыманнем», — падкрэсліваюць у арганізацыі са спасылкай на Пастанову Міністэрства ЖКГ № 17.
Што ўваходзіць у абавязкі сваякоў:
- рэгулярна прыбіраць смецце, старыя вянкі і апалае лісце;
- не дапускаць зарастання ўчастка травой і пустазеллем;
- абкошваць і прыбіраць не толькі сам участак, але і праходы паміж суседнімі магіламі.
На прэтэнзіі ў ЖКГ дадалі, што Дукорскія могілкі апошні раз абкошваліся 17 ліпеня, кантэйнеры для смецця там устаноўлены, а вось падвядзенне вады і калонкі генеральным планам выкарыстання аб'екта не прадугледжаны.
Каментары