У Варшаве абрабавалі і спрабавалі скрасці беларуса, калі ён клаў грошы на рахунак
Пяцёра грузінаў у Варшаве абрабавалі 25‑гадовага беларуса і спрабавалі зацягнуць яго ў сваю машыну.
Паліцыя ўжо затрымала падазраваных, ім пагражае да 20 гадоў пазбаўлення волі, піша Most.
Увечары 30 ліпеня на вуліцы Добаша 25‑гадовы грамадзянін Беларусі падышоў да банкамата з вялікай сумай наяўных грошай. Калі мужчына ўносіў сродкі на банкаўскі рахунак, да яго падышлі пяцёра грамадзян Грузіі.
Яны паспрабавалі зацягнуць беларуса ў аўтамабіль. Калі ён пачаў супраціўляцца, нападнікі павалілі яго на зямлю і пачалі біць рукамі па галаве. Пасля гэтага яны забралі барсетку, мабільны тэлефон і каля 20 тысяч злотых наяўнымі (каля 4650 еўра).
Беларус атрымаў цялесныя пашкоджанні галавы. Паліцэйскія, якія прыбылі на месца здарэння, аказалі яму першую дапамогу.
Паліцыя ўстанавіла месцазнаходжанне падазраваных у разбойным нападзе. На наступны дзень іх затрымалі ў вёсцы Духнаў, якая знаходзіцца за 15 кіламетраў на ўсход ад Варшавы. Узрост затрыманых — ад 23 да 29 гадоў. Падчас следчых дзеянняў была знойдзена частка выкрадзенага.
Грузінам выставілі абвінавачанне ў разбойным нападзе, здзейсненым групай асобаў па папярэдняй змове, са спробай пазбавіць ахвяру свабоды. Усіх абвінавачаных арыштавалі на тры месяцы.
Згодна з польскім Крымінальным кодэксам, за разбой, здзейснены групай асобаў, прадугледжана пакаранне ад трох да 20 гадоў пазбаўлення волі.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»4
Каментары