Еўрабачанне забараняе краінам, якія ваююць, прымаць конкурс — новыя правілы
Арганізатары конкурсу песні «Еўрабачанне» абвясцілі пра змяненне правіл, згодна з якім ніводная краіна, якая вядзе ўзброены канфлікт, не зможа прымаць у сябе конкурс, піша Euronews.
«Еўрабачанне» штогод праводзіць тэлекампанія краіны, якая перамагла ў папярэднім годзе; конкурс з'яўляецца сумесным праектам грамадскіх вяшчальнікаў, якія ўваходзяць у Еўрапейскі вяшчальны саюз (EBU).
Згодна з новымі правіламі, «вяшчальнік‑пераможца аўтаматычна пазбаўляецца права праводзіць конкурс, калі ўзброены канфлікт, складаная геапалітычная сітуацыя або любая іншая сітуацыя істотна закранае бяспеку, абароненасць або стабільнасць яго дзяржавы ці найбліжэйшага рэгіёна», гаворыцца ў заяве EBU.
Паколькі ў EBU ўваходзяць і нееўрапейскія вяшчальнікі, конкурс не абмежаваны толькі еўрапейскімі краінамі.
У EBU адзначылі, што перад тым як вырашыць, ці здольная краіна‑пераможца бяспечна прыняць у сябе конкурс, могуць заказаць незалежную ацэнку рызык для бяспекі.
У заяве ніводная краіна пайменна не згадвалася, але Ізраіль у 2025 і 2026 гадах быў блізкі да перамогі, абодва разы заняўшы другое месца.
Пяць краін — Іспанія, Ірландыя, Нідэрланды, Славенія і Ісландыя — байкатавалі конкурс 2026 года ў Вене, што стала першым падобным выпадкам у гісторыі конкурсу.
Яны заявілі, што не могуць удзельнічаць у конкурсе разам з Ізраілем праз яго вайну ў Газе, якая пачалася пасля нападу ХАМАС на Ізраіль 7 кастрычніка 2023 года.
Калі высветліцца, што краіна‑пераможца не можа правесці ў сябе конкурс, EBU прызначыць іншую прымаючую краіну.
Украіна прымала «Еўрабачанне» ў 2017 годзе, нягледзячы на канфлікт, які працягваўся на ўсходзе краіны паміж украінскімі войскамі і падтрыманымі Масквой сепаратыстамі.
Праўда, пасля перамогі Украіны ў конкурсе 2022 года яна не змагла прыняць наступны выпуск праз паўнамаштабнае ўварванне Расіі.
У выніку «Еўрабачанне‑2023» прайшло ў Ліверпулі ў Вялікабрытаніі.
Цяпер чытаюць
Расіяне сапраўды сталі часцей купляць нерухомасць у Беларусі? Вось што расказваюць рыэлтары18
Расіяне сапраўды сталі часцей купляць нерухомасць у Беларусі? Вось што расказваюць рыэлтары
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»1111
Басіст «Пятлі», яго 18‑гадовы сын і зорка «Разбітага сэрца пацана» — расказваем пра беларускамоўны гурт Prypiać, які прэзентаваў аўтарскую «Калыханку»11
Небарака з Ляхавічаў знік «на СВА» ўжо на трэці дзень, а ў барацьбе за грабавыя счапіліся сястра, сужыцелька і жонка — з чатырма дзецьмі, але чужымі88
Каментары