Экс-міністра культуры Маркевіча звольнілі з хлебнага месца. Туды ўскочыў іншы збіты лётчык
Прадстаўніцтва Пастаяннага камітэта Саюзнай дзяржавы ў Мінску — праца мары для адстаўных чыноўнікаў.
У прадстаўніцтве Пастаяннага камітэта Саюзнай дзяржавы (СД) у Мінску змяніўся кіраўнік. 55‑гадовы педагог па адукацыі Анатоль Маркевіч, які ў 2020‑2024 працаваў міністрам культуры, пакінуў хлебную пасаду.
На яго месца паставілі 52‑гадовага Сяргея Налівайку — той быў міністрам па падатках і зборах (2014-2024).
А Маркевіча пакінулі ў структуры прадстаўніцтва, але на ніжэйшай пазіцыі.
За права залезці перад пенсіяй на працу ў саюзную структуру змагаюцца многія адстаўныя чыноўнікі. Зарплаты тут ідуць па расійскіх стаўках, нашмат вышэйшых за беларускую. Гэта дазваляе за пару гадоў зарабіць прыстойныя грошы пры абсалютнай адсутнасці рэальнай працы. Саюзная дзяржава і так фантом, але калі нейкія рашэнні там і прымаюцца, то ў Маскве.
Зрэшты, гэтаксама чыноўнікі ў краінах Еўрасаюза змагаюцца за права трапіць у Еўрапарламент, што таксама дазваляе атрымаць у разы большы заробак, а пасля і прэтэндаваць на высокую пенсію.
Маркевіч пратрымаўся на пасадзе ўсяго год. А вось яго папярэдніца Марыяна Шчоткіна ўзначальвала прадстаўніцтва СД ажно шэсць гадоў — з 2019 да 2025.
Будучы міністрам культуры, Маркевіч заяўляў, што «здраднікам не месца на сцэне», а беларуская культура пасля 2020‑га ачысцілася ад «дэструктыўных элементаў». Пры ім пастрожылі правілы выдачы гастрольных пасведчанняў і вярнулі чорныя спісы артыстаў. Пры ім жа канчаткова разграмілі Купалаўскі і не знялі ніводнага запамінальнага фільма.
Каментары