Паехаў на адпачынак з жонкай і дочкамі, але дадому не вярнуўся. У аварыі ў Грузіі загінуў 38‑гадовы мінчук Сяргей
У страшнай аварыі, якая здарылася 12 жніўня на горнай дарозе ў Грузіі, загінулі чацвёра беларусаў. Сярод іх — Сяргей Рыбалаў.
На адпачынак ён прыехаў разам з жонкай Любоўю і дзвюма маленькімі дочкамі. Яны таксама знаходзіліся ў мікрааўтобусе, які на спуску з высакагорнага курорта Гомісмта сарваўся ў цясніну.
Сяргей Рыбалаў працаваў у ААТ «Газпром трансгаз Беларусь». Ягоная жонка Любоў родам з Гродна, ёй 35 гадоў. Сям’я жыла ў Мінску і выхоўвала дзвюх маленькіх дачок.
У сацсетках Сяргея захаваліся здымкі з падарожжаў, у тым ліку па Еўропе, а таксама фота на заснежаным вадаёме, каля прасвідраванай палонкі і ледабура. Мяркуючы па гэтым, зімовая рыбалка была адным з ягоных захапленняў.
У Грузію на адпачынак яны паехалі ўсёй сям'ёй.
Увечары 12 жніўня група беларускіх турыстаў вярталася з Гомісмты — высакагорнага курортнага пасёлка ў грузінскім рэгіёне Гурыя. Гомісмту называюць «курортам над аблокамі». Людзі падымаюцца туды дзеля відаў на горы, заходаў сонца і Чорнага мора. Але дарога да пасёлка і назад праходзіць праз стромкія схілы і серпанцін.
На 16‑м кіламетры дарогі ў бок Азургэці мікрааўтобус з’ехаў з праезнай часткі, паляцеў у цясніну і ўрэзаўся ў дрэва. У салоне знаходзіліся 19 грамадзян Беларусі. Чацвёра з іх загінулі, яшчэ 15 атрымалі траўмы. Сярод пацярпелых былі шасцёра дзяцей.
Акрамя Сяргея Рыбалава, ахвярамі аварыі сталі 21‑гадовы Глеб Мельнік і ягоная 20‑гадовая нявеста Настасся Філюк з Брэста. Маладыя людзі збіраліся ажаніцца і паехалі ў вандроўку пасля заручын. Чацвёртай загінулай стала 55‑гадовая Жанна.
Паводле сведчанняў відавочцаў, падчас падзення мікрааўтобуса Сяргея выкінула праз лабавое шкло. Ён апынуўся ніжэй на схіле і загінуў не адразу. Наверсе заставаліся ягоная жонка і дочкі. Яны бачылі Сяргея, але нічога не маглі зрабіць.
Ратавальная аперацыя ў цясніне працягвалася некалькі гадзін. Частка пасажыраў вылецела праз вокны, іншыя аказаліся заціснутыя ў пашкоджаным мікрааўтобусе. Пацярпелых даставілі ў бальніцы Батумі, Азургэці і Чахатауры. Спачатку двое знаходзіліся ў рэанімацыі, аднак медыкі паведамлялі, што непасрэднай пагрозы іх жыццю няма. Да 16 жніўня з бальніц выпісалі 12 беларусаў, у тым ліку пяцярых дзяцей. Яшчэ трое заставаліся пад наглядам дактароў.
Адразу пасля трагедыі ў грузінскіх і беларускіх медыя з’явіліся супярэчлівыя версіі паводзінаў кіроўцы. Некаторыя выданні сцвярджалі са спасылкай на мясцовых жыхароў, што ён паспеў выскачыць з машыны. Відавочцы аварыі, наадварот, кажуць, што кіроўца не пакідаў мікрааўтобус на хаду і сам атрымаў цяжкія траўмы. У афіцыйным паведамленні грузінскай пракуратуры пра скачок кіроўцы не гаворыцца.
Высветлілася, што ў кіроўцы не было катэгорыі пасведчання, неабходнай для перавозкі такой колькасці людзей.
Кіроўца таксама быў траўмаваны. 15 жніўня яго даставілі з бальніцы ў Азургецкі раённы суд. Суд пастанавіў пакінуць мужчыну пад вартай. Яго абвінавачваюць у парушэнні правіл бяспекі руху, якое прывяло да смерці больш як двух чалавек. Максімальнае пакаранне паводле гэтага артыкула — дзесяць гадоў пазбаўлення волі.
Апошняе вяртанне ў Мінск
17 жніўня целы ўсіх чатырох загінулых адным рэйсам даставілі ў Мінск.
Сяргея Рыбалава пахавалі ў Мінску ў сераду, 19 жніўня.
Планавалі вяселле, але не вярнуліся з адпачынку. У аварыі ў Грузіі загінулі 21‑гадовы Глеб і 20‑гадовая Настасся з Брэста
У Грузіі ў аварыі загінулі чатыры беларусы
«Дрэва напалову бус зламала». Сталі вядомыя новыя падрабязнасці трагічнага здарэння з беларускімі турыстамі ў Грузіі
Яшчэ васьмёра пацярпелых у ДТЗ у Грузіі беларусаў выпісаныя з бальніц
Каментары
[Зрэдагавана]