У Валожынскім раёне зруйнуюць усе пабудовы сядзібы XIX стагоддзя — яшчэ і 14 тысяч патрацяць на знос
У вёсцы Чэхаўшчына рыхтуюцца да зносу большай часткі шляхецкай сядзібы. У той жа час сам панскі дом выставілі на электронныя таргі з вельмі спецыфічнымі ўмовамі для будучага ўласніка.
Як паведамляе тэлеграм-канал «Спадчына», мясцовыя ўлады выдзелілі бюджэтныя сродкі на знос васьмі пабудоў гістарычнага комплексу. Згодна з афіцыйнымі матэрыяламі на сайце дзяржаўных закупак, на гэта патрацяць 14 тысяч рублёў з раённага бюджэту.
Рашэнне было прынятае Валожынскім райвыканкамам яшчэ ў канцы мая. У пералік будынкаў, якія падлягаюць ліквідацыі, трапілі ўсе гаспадарчыя аб'екты былой сядзібы: склад-лядоўня, склад для агародніны, харчовы склад, хлеў для каня, кармакухня, бензасклад і два жылыя дамы.
Фарміраванне шляхецкага комплексу ў Чэхаўшчыне адбывалася ў сярэдзіне XIX стагоддзя. Самым каштоўным аб'ектам з тых, што падлягаюць зносу, з'яўляецца лядоўня.
Згодна з манаграфічнымі даследаваннямі гісторыка архітэктуры Анатоля Федарука, гэта аўтэнтычны квадратны ў плане будынак памерам 8х8 метраў, узведзены з бутавага каменю з выкарыстаннем чорнага шчэбню на вапнавым росчыне — так званай тэхніцы «разынкавай муроўкі». Над уваходам у лядоўню захавалася арыгінальная перамычка з выразанай датай будаўніцтва — «Roku 1855».
Паралельна з падрыхтоўкай да зносу гаспадарчага фону Валожынскі райвыканкам выставіў на таргі сам драўляны сядзібны дом агульнай плошчай 433,7 кв. м. Афіцыйна будынак фігуруе як «гаспадарчы корпус 1957 года пабудовы», таму здагадацца, што гэта насамрэч шляхецкая сядзіба 1849 года пабудовы патэнцыйны інвестар ніяк не зможа. Такія памылкі ўзніклі праз тое, што ў выніку пасляваеннай савецкай інвентарызацыі старым будынкам прысвойвалі дату першага капітальнага рамонту або ўліку.
Мясцовыя ўлады не ставяць перад патэнцыйным пакупцом патрабаванняў аб абавязковым захаванні аб'екта. Згодна з умовамі таргоў, новы ўласнік сядзібнага дома можа правесці рэканструкцыю будынка альбо цалкам яго зруйнаваць і пабудаваць на гэтым месцы новы аб'ект цягам пяці гадоў.
«Наша Нiва» — бастыён беларушчыны
ПАДТРЫМАЦЬ-
Каля Барысавага каменя ў Полацку спілавалі старыя таполі. Цяпер перад Сафійскім саборам пустка
-
Гэтая беларуска так удала парадзіруе беларускіх прапагандыстаў і рускіх лібералаў, што яе відэа ўспрымаюць за чыстую манету ВІДЭА
-
Мужчыны Шапэна. Новае даследаванне расказвае пра асабістае жыццё кампазітара
Каментары
[Зрэдагавана]
>>Акупацыйныя ўлады
Беларусы акупавалі беларусаў?