Мінадукацыі замест абавязковага рэестра рэпетытараў створыць іх «вітрыну»
Міністэрства адукацыі Беларусі адмовілася ад ідэі ствараць абавязковы рэестр рэпетытараў. Замест яго плануюць запусціць адмысловую «вітрыну фізічных асоб, якія самастойна займаюцца прафесійнай дзейнасцю па навучанні дзяцей». Пра гэта 25 жніўня паведаміла дырэктарка Дэпартамента кантролю якасці адукацыі Міністэрства адукацыі Вольга Рыбаключава.
Паводле слоў чыноўніцы, новая сістэма не будзе базай для праверак. Яе задумалі як сэрвіс, які дапаможа бацькам знаходзіць рэпетытараў, а педагогам — прадстаўляць свае паслугі.
Галоўны прынцып «вітрыны» — добраахвотнасць. Рэпетытары самі будуць вырашаць, ці размяшчаць там сваю інфармацыю. Адмова ад удзелу не будзе перашкаджаць чалавеку займацца самастойнай прафесійнай дзейнасцю па навучанні дзяцей.
Міністэрства адукацыі пры гэтым будзе пацвярджаць прафесійныя звесткі пра педагогаў — напрыклад, інфармацыю пра адукацыю і адсутнасць судзімасці. Гэтыя звесткі будуць даступныя ў адкрытым выглядзе.
У міністэрстве лічаць, што наяўнасць адпаведнага прозвішча ў «вітрыне» стане своеасаблівым знакам прафесіяналізму, які дапаможа рэпетытару вылучыцца сярод іншых спецыялістаў.
Запусціць новую сістэму плануюць з 1 верасня 2026 года.
Раней на грамадскае абмеркаванне вынеслі законапраект аб самастойнай прафесійнай дзейнасці па навучанні дзяцей. Ён, у прыватнасці, прадугледжваў стварэнне спецыяльнага рэестра рэпетытараў.
«Кайлас, я іду». Што за беларуска знікла ў жудасным селі ў Непале6
Каментары