Памёр беларускі гісторык і кнігавыдавец Іосіф Хаўратовіч, паведамілі ягоныя знаёмыя ў сацсетках. Яму было 96 гадоў.
Іосіф Хаўратовіч нарадзіўся 24 снежня 1929 года ў вёсцы Варгуццева Круглянскага раёна Магілёўскай вобласці.
У 1948 годзе скончыў Мінскае мастацкае вучылішча. Працаваў бібліятэкарам, затым узначальваў Талачынскі раённы Дом культуры і працаваў інспектарам аддзела культасветустаноў Талачынскага райвыканкама. У 1955 годзе скончыў Беларускі дзяржаўны ўніверсітэт.
Пасля гэтага працаваў у Інстытуце гісторыі партыі пры ЦК КПБ: быў навуковым супрацоўнікам, загадваў сектарам, а пазней стаў вучоным сакратаром. У 1967 годзе атрымаў ступень кандыдата гістарычных навук, а ў 1976‑м стаў лаўрэатам Дзяржаўнай прэміі Беларусі.
З 1967 года Хаўратовіч працаваў у рэдакцыі Беларускай энцыклапедыі, дзе спачатку ўзначальваў рэдакцыі па гісторыі СССР і БССР, з 1973 года быў адказным сакратаром, а з 1975‑га — намеснікам галоўнага рэдактара. У 1983 годзе яму прысвоілі званне заслужанага работніка культуры Беларусі.
Асноўныя навуковыя працы Хаўратовіча прысвечаныя гісторыі рэвалюцыйнага і нацыянальна-вызваленчага руху ў Заходняй Беларусі, рэвалюцыі 1917 года, гісторыі Другой сусветнай вайны і дзейнасці беларускіх камуністычных арганізацый.
Ён быў адным з аўтараў манаграфіі «Революционный путь Компартии Западной Белоруссии», а таксама аўтарам даследаванняў і нарысаў пра вядомых дзеячаў нацыянальна-вызваленчага і рэвалюцыйнага руху. Пісаў пра Веру Харужую, Аляксея Салаўя, Леапольда Родзевіча, Соф'ю Панкову, Івана Пуліхава, Паўла Лепяшынскага, Уладзіміра Азіна, Міхаіла Фрунзэ і іншых.
Хаўратовіч таксама ўдзельнічаў у падрыхтоўцы шматлікіх дакументальных зборнікаў, прысвечаных гісторыі Кастрычніцкай рэвалюцыі ў Беларусі, рэвалюцыйнаму руху ў Заходняй Беларусі, партызанскай барацьбе ў гады Другой сусветнай вайны, злачынствам нацыстаў на тэрыторыі Беларусі і савецка-польскім адносінам.
Акрамя навуковай працы, ён у 1990‑х удзельнічаў у стварэнні «Ілюстраванай храналогіі гісторыі Беларусі» і распрацоўцы прынцыпаў падрыхтоўкі энцыклапедычных выданняў.
Цяпер чытаюць
Таксістка з Таджыкістана насмерць збіла беларуску ў Польшчы — і спакойна пакінула краіну16
Каментары