Tesla выпусціла на вуліцы робатаксі без руля і педаляў. Ці наважацца людзі ў іх сесці?
Спрабуючы дагнаць канкурэнтаў на рынку беспілотных таксі, Ілан Маск пайшоў на крок, на які пакуль наважваліся нямногія. Для Tesla гэта можа стаць адным з самых важных эксперыментаў апошніх гадоў.
Апошнія гады для аўтамабільнага бізнэсу Ілана Маска былі няпростымі. Продажы Tesla летась скараціліся другі год запар, прыбытак кампаніі ўпаў, а першынство на сусветным рынку электрамабіляў перайшло да кітайскай BYD.
Таму будучыню Tesla Маск усё часцей звязвае не толькі з продажам электрамабіляў. Адной з галоўных ставак кампаніі сталі машыны, здольныя самастойна вазіць пасажыраў.
Сэрвіс беспілотных таксі Tesla працуе ў Осціне (штат Тэхас) з чэрвеня мінулага года, а пазней з'явіўся яшчэ ў пяці гарадах Тэхаса і Фларыды. Спачатку ў машынах знаходзіліся страхавыя кіроўцы, гатовыя перахапіць кіраванне ў выпадку праблем. Цяпер частка робатаксі ўжо ездзіць без іх.
Паводле звестак сайта RobotaxiTracker, такіх машын у Tesla больш за 200. Гэта, аднак, нашмат менш, чым у галоўнага канкурэнта — кампаніі Waymo, якая належыць той жа карпарацыі, што і Google. У яе больш за 4000 беспілотных таксі ў 14 гарадах.
Дагэтуль, аднак, нават робатаксі Tesla без страхавога кіроўцы заставаліся аўтамабілямі са звыклымі органамі кіравання — рулём і педалямі. Цяпер Маск вырашыў адмовіцца і ад іх.
Як піша Associated Press, у чацвер Tesla выпусціла на вуліцы Осціна дзясяткі Cybercab — беспілотных таксі, у якіх няма ні руля, ні педаляў. Калі нешта пойдзе не так, пасажыр фізічна не зможа перахапіць кіраванне.
No steering wheel, no pedals
«Ніякага руля, ніякіх педаляў», — так у акаўнце Tesla Robotaxi ў X анансавалі запуск новых аўто. Сам Маск апублікаваў выяву гіганцкага Cybercab над Осцінам, а пазней напісаў: «Бура Cybercabs».
A Storm of Cybercabs
Пакуль незразумела, як хутка Tesla збіраецца разгортваць новы сэрвіс. Але, як адзначае AP, Маску трэба спяшацца: па колькасці машын і паездак яго кампанія істотна адстае ад Waymo.
Адрозніваецца і тэхнічны падыход канкурэнтаў. Tesla робіць стаўку на камеры: менавіта з іх дапамогай аўтамабіль павінен распазнаваць дарогу, іншыя машыны і пешаходаў. Waymo і яшчэ адзін канкурэнт, Zoox ад Amazon, акрамя камер выкарыстоўваюць радары і лідары, якія вызначаюць адлегласць да навакольных аб'ектаў пры дапамозе лазераў.
Tesla цяпер трэба даказаць, што яе сістэма здольная бяспечна арыентавацца ў складаным гарадскім руху і без такога дадатковага абсталявання.
Але ці захочуць людзі садзіцца ў машыну без руля?
Нават калі тэхналогія будзе працаваць бездакорна, застаецца яшчэ адна праблема — давер пасажыраў.
Апытанне Pew Research Center, праведзенае ў лютым, паказала, што сем з дзесяці дарослых амерыканцаў адчувалі б сябе некамфортна ў беспілотным аўтамабілі. Толькі 7% заявілі, што адчувалі б сябе ў такой машыне вельмі або надзвычай камфортна, яшчэ 16% — у пэўнай ступені камфортна.
BREAKING: Tesla has officially started offering Cybercab rides to the public.
I’ve been waiting years to say that!
I took one of the world's first public rides. The cabin is comfortable and spacious, the suspension is soft, and FSD is VERY smooth. It’s an incredible vehicle.… pic.twitter.com/XBzJI9EVQm
Аднак планы Маска значна шырэйшыя за некалькі дзясяткаў Cybercab у Осціне. У перспектыве ён хоча зрабіць беспілотнымі сотні тысяч ужо выпушчаных Tesla пры дапамозе абнаўлення праграмнага забеспячэння.
Паводле яго задумы, уладальнік зможа адпраўляць свой аўтамабіль працаваць таксі ў той час, калі сам ім не карыстаецца.
На шляху да гэтага ёсць яшчэ адна перашкода — рэгулятары. У большасці краін Еўрасаюза Tesla дагэтуль не атрымала дазволу нават на выкарыстанне сваёй сістэмы часткова аўтаномнага кіравання. А ў ЗША, дзе яна ўжо выкарыстоўваецца, рэгулятары праводзяць некалькі расследаванняў, звязаных з яе бяспекай.
Але інвестараў рызыкі пакуль не палохаюць. У дзень запуску Cybercab акцыі Tesla выраслі больш чым на 5%.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»9
Каментары