На свабодзе Павел Белавус, заснавальнік культавай крамы Symbal.by
Культурніцкі менеджар не выязджаў з Беларусі пасля пачатку масавых рэпрэсій. Па яго прыйшлі ў канцы 2021 года. Паўлу Белавусу прысудзілі 13 гадоў зняволення. Сёння ён выйшаў на волю.
Культурніцкі менеджар трапіў у групу палітвязняў, вызваленых 16 верасня пасля прыезду амерыканскай дэлегацыі ў Мінск.
Белавуса затрымалі 15 лістапада 2021‑га пасля выкліку ў міліцыю. Пасля гэтага актывіст тройчы трапіў на суткі — у суме назбіралася 35 дзён. Далей яго перавялі ў СІЗА, дзе выставілі крымінальнае абвінавачванне.
Паўла асудзілі па чатырох крымінальных артыкулах: арт. 342 (удзел у пратэстах), арт. 361 (заклікі да санкцый), арт. 361‑1 (стварэнне ці ўдзел у экстрэмісцкім фармаванні) і арт. 356 (здрада дзяржаве). Выніковы прысуд — 13 гадоў зняволення.
Белавус адбываў свой тэрмін у шклоўскай калоніі №17.
На волі яго чакалі жонка і двое дзяцей.
Павел Белавус нарадзіўся ў Лідзе ў 1987 годзе. Скончыў геафак у Брэсцкім дзяржуніверсітэце, яшчэ ў юнацтве зацікавіўся журналістыкай і актывізмам.
У пачатку 2010‑х ён супрацоўнічаў як журналіст з «Радыё Свабода». Таксама Белавус — адзін з арганізатараў святкавання 100‑годдзя БНР у 2018-м, заснавальнік і былы дырэктар творчай пляцоўкі «Арт Сядзіба».
У 2014‑м Белавус заснаваў краму нацыянальнай сімволікі Symbal.by, якая набыла асаблівую вядомасць летам 2020-га. Тады ў краме прадаваліся цішоткі і налепкі з надпісам «ПСІХОЗ%» — адсылка да выказванняў Лукашэнкі пра «каранавірусны псіхоз» і ідэі пра рэйтынг Лукашэнкі ў 3%.
Улады пачалі ціснуць на Symbal.by, і краму давялося зачыніць. Дзясяткі беларусаў прыйшлі падтрымаць краму ў апошні дзень працы — тады чаргу жорстка разагналі сілавікі.
«Наша Нiва» — бастыён беларушчыны
ПАДТРЫМАЦЬ«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»8
Каментары