Дзеці Гары і Меган змянілі школу праз некалькі дзён пасля пачатку года. Прычына — інтэнсіўны дарожны рух
Дзяцей трэба было вазіць у школу на некалькіх аўтамабілях
Прынц Гары і яго жонка Меган вырашылі змяніць школу для сваіх дзяцей у Вялікабрытаніі ўсяго праз некалькі дзён пасля таго, як тыя пачалі вучыцца. Прычынай сталі асцярогі наконт бяспекі, звязаныя з дарожным рухам падчас паездак у школу, піша Бі-бі-сі.
У жніўні герцаг і герцагіня Сасэксскія (гэта іх цяперашнія афіцыйныя тытулы) паведамілі, што вяртаюцца ў Вялікабрытанію з ЗША, дзе яны жылі апошнія гады. Як паведамлялася, гэтае рашэнне шмат у чым было звязана з жаданнем мужа і жонкі даць сваім дзецям брытанскую адукацыю.
Аднак школу, якую яны першапачаткова абралі для сямігадовага прынца Арчы і пяцігадовай прынцэсы Лілібет, давялося амаль адразу змяніць.
Як стала вядома, прыватная ахова Гары і Меган была занепакоеная тым, што адлегласць і інтэнсіўны дарожны рух на першапачатковым маршруце паездкі ў школу ўскладнялі забеспячэнне бяспекі.
Мяркуючы па паведамленнях брытанскай прэсы, дзяцей трэба было вазіць у школу на некалькіх аўтамабілях. А ва ўмовах гадзіны пік, калі многія брытанскія бацькі вязуць сваіх дзяцей у школы або забіраюць іх адтуль, рух калонай — не самае зручнае рашэнне.
Мяркуецца, што маршрут да школы правяралі яшчэ да пачатку навучальнага семестра, аднак з улікам школьнага трафіку яго прызналі недастаткова бяспечным.
Крыніца, блізкая да мужа і жонкі, паведаміла: «Рашэнне аб пераводзе дзяцей у іншую школу было прынята пасля абмеркавання практычных аспектаў дзейных мер бяспекі з камандай, якая адказвае за бяспеку сям'і».
Яна дадала: «Бацькі вельмі ўдзячныя ўсім настаўнікам і супрацоўнікам за любоў, клопат і намаганні, якія яны праявілі ў адносінах да іх сям'і. Гэтае рашэнне ні ў якім разе не варта інтэрпрэтаваць як крытыку школы або той выключнай увагі і клопату, якімі там былі акружаныя дзеці».
Цяпер чытаюць
Памятаеце пару студэнткі і выкладчыка духоўнага вучылішча, які старэйшы за яе на 31 год? Яны разбегліся42
Памятаеце пару студэнткі і выкладчыка духоўнага вучылішча, які старэйшы за яе на 31 год? Яны разбегліся
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну77
Каментары