У Гродне дзіцячы садок перарабілі ў жылы дом — вось як выглядае
Будынку было больш за 100 гадоў.
У цэнтры Гродна неўзабаве з'явіцца яшчэ адзін жылы дом. У жыллё ператварыўся былы дзіцячы сад на вуліцы Васілька, піша Newgrodno.by.
Будынку было больш за 100 гадоў. Але апошнім часам ён стаяў без справы. Таму будынак выставілі на аўкцыён: новы ўласнік прыняў рашэнне змяніць прызначэнне аб'екта і рэканструяваць яго. Але, па сутнасці, дом разабралі, а затым пабудавалі нанова.
Старую цэглу пры гэтым выкарысталі. З яе, як бачна на фатаграфіях, узвялі частку сцен.
Будынак стаў большым у аб'ёме. Яму дадалі, у прыватнасці, мансардавы паверх. З'явіўся і падвал, у якім абсталююць спартыўную залу.
Вядома, што ўнутры размесцяцца шэсць кватэр вольнай планіроўкі. Праўда, інфармацыі пра метраж і кошт жылля пакуль у адкрытых крыніцах няма.
Работы працягваюцца не толькі на самім будынку. Пачалі будаўнікі і добраўпарадкаванне тэрыторыі. Каля дома абсталююць паркоўку для жыхароў.
Каментары