Стваламазгавы імплант упершыню паставілі беларускаму дзіцяці. Хлопчык нарадзіўся цалкам глухім
Дзякуючы яму трохгадовы Платон Мірановіч пачаў чуць.
Упершыню ў Беларусі дзіця атрымала стваламазгавы імплант — цяпер ён чуе. На аперацыю збіралі ўсёй краінай — €85 тыс. паступілі на рахунак бацькоў за два з паловай месяцы, піша выданне Мінскага раёна «Прысталічча».
Платон жыве ў вёсцы Ляскоўка Мінскага раёна. Ён нарадзіўся глухім, хоць яго брат-блізнюк Ярык з'явіўся на свет цалкам здаровым.
Дакладны дыягназ дзіцяці — прыроджаная адсутнасць вушных скруткаў і паўкруглых каналаў, двухбаковая нейрасенсорная тугавухасць.
Зноў чуць Платон мог пачаць толькі пасля аперацыі на мозгу — яму быў неабходны стваламазгавы імплант.
Каб сабраць усю суму на аперацыю (€85 тыс.), бацькі адкрылі дабрачынны збор. Грошы з'явіліся нечакана хутка — за два з паловай месяцы.
І ўжо ў сакавіку ва Універсітэцкай клініцы Вюрцбурга ў Германіі Платону зрабілі неабходную аперацыю. Агулам хлопчык правёў пад наркозам 11 гадзін.
«Было страшна. Дактары папярэджвалі, што аперацыя можа прайсці не па плане. Калі б мозг не даў адказу на датчыкі, рану проста зашылі б і адправілі нас дадому», — распавяла мама Анастасія.
У маі ў рэанімацыі пад наглядам дактароў дзіцяці падключалі 12 датчыкаў. Працэс быў хвалюючы, бо спрацаваць маглі не ўсе.
«Мне хацелася верыць, што Платон адразу скажа: «Мама, я цябе люблю». Але, натуральна, гэтага не адбылося. Хоць нам вельмі пашанцавала — усе 12 датчыкаў падключыліся», — адзначыла Анастасія.
Цяпер хлопчыку здымаюць апарат толькі на ноч. За вухам у яго ўжыўлена металічная пласціна, да якой і мацуецца апарат — маленькая магнітная таблетка.
Пакуль што дадаткова даводзіцца выкарыстоўваць павязку, бо апарат прызначаны для дарослых.
Адчувальнасць датчыкаў будуць наладжваць паступова, каб не перагружаць дзіця і не палохаць яго моцнымі гукамі.
Платон ужо вучыцца размаўляць
Цяпер Платон займаецца з педагогамі. І ўжо ёсць першыя поспехі: ён навучыўся вымаўляць гукі «а» і «у».
Часам хлопчык можа міжвольна паклікаць бацькоў, сказаць доўгачаканыя словы «мама» і «тата».
Таксама Платон пайшоў у дзіцячы садок, у тую ж групу, куды ходзіць яго брат Ярык.
Анастасія прызнаецца, што часам адпусціць сына бывае няпроста — яна вельмі за яго перажывае. Бо любая траўма для Платона можа стаць фатальнай.
У Германію сям'і яшчэ давядзецца ездзіць — стабільна раз на тры месяцы для наладжвання датчыкаў.
Усе выдаткі сям'я плануе аплачваць самастойна.
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў2
Каментары