Марыі Калеснікавай прысудзілі званне ганаровай прафесаркі ў Зальцбургу
Такое званне ўніверсітэт Моцартэум прысудзіў упершыню за ўсю сваю гісторыю. Рашэнне прынялі яшчэ ў 2022 годзе, калі Калеснікава знаходзілася ў беларускай турме, але асабіста прыняць званне яна змагла толькі цяпер.
Марыя Калеснікава прыняла званне ганаровай прафесаркі Універсітэта Моцартэум у аўстрыйскім Зальцбургу, паведамляе ORF.
Універсітэт прысудзіў ёй званне чатыры гады таму. Пра гэта Марыя даведалася з ліста сваёй сястры Таццяны Хоміч. Гэта было апошняе паведамленне, якое дайшло да яе перад працяглай ізаляцыяй.
«Гэты ліст звязаў мяне з сям’ёй, музыкай і людзьмі па-за турэмнымі сценамі. Ён нагадаў мне, што пра мяне думаюць і што я ўсё яшчэ належу да гэтага свету», — расказала Калеснікава падчас цырымоніі.
Рэктарка Моцартэума Канстанца Вімер адзначыла, што Калеснікава стала першай ганаровай прафесаркай у гісторыі ўніверсітэта. Паводле яе, гэтае званне цяпер непарыўна звязана з імем беларускай флейтысткі і палітычнай дзяячкі.
У будучыні Калеснікава будзе часта бываць у Зальцбургу. Яна плануе выкладаць у Моцартэуме і працаваць там над доктарскай дысертацыяй.
Звяртаючыся да студэнтаў, Калеснікава прыгадала момант, калі ў 2020 годзе беларускія сілавікі спрабавалі прымусова вывезці яе з краіны, але яна парвала пашпарт на мяжы і засталася ў Беларусі.
«Часам на прыняцце рашэння застаецца мала часу, а ціск і страх вельмі вялікія. У кабінеце, дзе вас прымушаюць зрабіць выбар, вы, магчыма, праведзяце 15 секунд. А пасля ўсё жыццё будзеце глядзець на сябе ў люстэрка. Я жадаю вам, каб у такі момант вы змаглі прыняць рашэнне, пасля якога зможаце глядзець у люстэрка без сораму», — сказала яна.
Прафесар Моцартэума Кай Орэм нагадаў, што ў Беларусі застаецца больш за тысячу палітвязняў.
«Наша праца яшчэ не закончаная. Цяпер няма прагрэсу ў перамовах аб вызваленні. Важна не выпускаць гэтую тэму з увагі», — заявіў ён.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары