У Францыі хакеры ўзламалі халадзільнікі ў сотнях супермаркетаў. Замест мінусавой тэмпературы яны сталі даваць плюсавую
У Францыі хакеры ўзламалі сістэмы кіравання халадзільным абсталяваннем у сотнях супермаркетаў. У ноч на 12 кастрычніка яны перавялі ўстаноўкі ў рэжым размарожвання і задалі тэмпературу 50 градусаў. Прадукты, якія некалькі гадзін награваліся, сапсаваліся. У некаторых крамах таксама ўзніклі пажары, паведамляе Reuters.
Кібератака закранула гандлёвую сетку Coopérative U і каля 150 крам Intermarché. У Carrefour паведамілі, што пацярпелі 80 супермаркетаў з прыкладна шасці тысяч, якія сетка мае ў Францыі. Узломы халадзільнага абсталявання таксама закранулі сеткі Netto і Leclerc.
Крамы былі вымушаныя выкінуць сапсаваныя прадукты. Паводле ацэнак французскага тэлеканала BFMTV, агульныя страты гандлёвых сетак могуць вылічацца мільёнамі еўра.
Прэм’ер-міністр Францыі Себасцьен Лекарню даручыў Нацыянальнаму агенцтву кібербяспекі Францыі (ANSSI) расследаваць інцыдэнт. Паводле крыніцы Reuters, агенцтва высветліла, што хакеры скарысталіся ўразлівасцю ў праграмным забеспячэнні халадзільных установак дацкай кампаніі Danfoss.
У Danfoss заявілі, што ведаюць пра інцыдэнты ў Францыі, якія закранулі абмежаваную колькасць сістэм кіравання халадзільным абсталяваннем. Кампанія патлумачыла, што ўзламаныя прылады працавалі на састарэлай прашыўцы. Паводле яе прадстаўнікоў, кліентам ужо даўно рэкамендавалі абнавіць сістэмы да апошняй версіі або замяніць абсталяванне.
З праблемай у сферы бяспекі сутыкнуўся і нідэрландскі рытэйлер Ahold Delhaize, якому належыць найбуйнейшая ў краіне сетка супермаркетаў Albert Heijn. Мабільны дадатак кампаніі паведаміла кліентам, што праз інцыдэнт з кібербяспекай дастаўка прадуктаў часова немагчымая. Пры гэтым звычайныя крамы сеткі працягнулі працу. Пакуль невядома, ці звязаныя праблемы Ahold Delhaize з кібератакай на французскія супермаркеты.
Каментары