Mienhiele i Ajbality turemnaj biełaruskaj miedycyny
30.09.2013 / 13:06
Adnosna fielčara minskaha SIZA № 1, jaki dziažuryŭ u noč śmierci Ihara Pcičkina, raspačata kryminalnaja sprava pavodle častki 2 artykuła 162 (nienaležnaje vykanańnie prafiesijnych abaviazkaŭ miedrabotnikam, što paciahnuła za saboj pa nieaściarožnaści śmierć pacyjenta).
Vypadak 21-hadovaha minčuka Ihara Pcičkina prymusiŭ zadumacca, što ŭvohule ŭjaŭlaje ź siabie turemnaja miedycyna.
My apytali byłych palitviaźniaŭ, jakija padčas znachodžańnia za kratami mieli istotnyja prablemy sa zdaroŭjem.
«Daktary sprabavali zastacca daktarami»
Źmicier Bandarenka mučyŭsia ŭ turmie ad prablemaŭ sa śpinaj. Urešcie jamu zrabili apieracyju na chrybcie. Paśla źjaŭlalisia inšyja balački – sasudy.
«Turemnaja miedycyna niaredka vykarystoŭvajecca jak srodak cisku na viaźniaŭ, — kaža Źmicier.
– Na etapie śledstva tabie kažuć, što naležnuju dapamohu mohuć akazać tolki ŭ tym vypadku, kali ty budzieš supracoŭničać, davać pakazańni. Tak było i ŭ mianie ŭ «amierykancy», kali mnie tre' byli kansultacyi nieŭrołaha, niejrachirurha. Ja b skazaŭ, što ŭ turmie KDB nie było, jak takoj, miedycyny, a byli elemienty miedycyny».
«Štodnia pa kamierach chodzić fielčar»
Potym Źmitra pieraviali ŭ inšy śledčy izalatar na vulicu Vaładarskaha, tam, dzie i adbyŭsia vypadak ź Iharam Pcičkinym.
«Štodnia pa kamierach chodzić fielčar, zapisvajučy, ci jość u kaho skarhi, ci treba kansultacyi doktara, razdaje tabletki.
Tym nie mienš, prośby mohuć prosta praihnaravać. Ja čakaŭ pryjomu ŭ doktara bolš za tydzień».
Charakternaja reč, što na siońnia bolš nie isnuje Respublikanskaj turemnaj balnicy, jakaja raniej mieściłasia na Kalvaryjskaj. Jość asobnyja adździaleńni na sotniu čałaviek u tym ža SIZA na Vaładarskaha i ŭ Žodzinie.
«Heta kamiera z dvuchiarusnymi łožkami. Paśla apieracyj ludzi niaredka vymušanyja leźci na druhi pavierch. U dačynieńni da mianie nahlad byŭ naležnym, ale heta dziakujučy ŭvazie mižnarodnych arhanizacyj», — praciahvaje Bandarenka.
«Daktary sprabavali zastacca daktarami»
«U Mahiloŭskaj turmie №15 umovy byli bolš-mienš. Było dobraje charčavańnie. Adziny minus – adsutnaść prahułak dla chvorych. Viedajecie, u turemnaj miedycynie šmat čaho zaležała ad apieratyŭnych rabotnikaŭ. U miedčastcy mahli pakłaści i zdarovaha čałavieka, kali byŭ taki zahad, a chvoraha – nie. Užo niama čałaviek dvanaccać z tych, z kim ja siadzieŭ», - raskazvaje Bandarenka.
Tym nie mienš, jon kaža, što kvalifikacyja daktaroŭ była narmalnaj. «Kali niama zahadu na advarotnaje, to jany robiać usio prafiesijna».
Apieracyju Bandarenku rabili ŭ cyvilnym špitali. Adrazu paśla chirurhičnaha ŭmiašańnia jaho prykavali kajdankami da łožka, achoŭvali try milicyjanty. «Heta vielmi darahoje zadavalnieńnie. Tamu ŭsie chočuć, kab chutčej vypisali».
Źmicier kaža, što adnoj z hałoŭnych prablemaŭ źjaŭlajecca nie jakaść miedycynskich pasłuh, a adsutnaść srodkaŭ na lačeńnie. «Isnuje takoje hramadskaje mierkavańnie, što tam bandyty i ich lačyć nieabaviazkova. I hety stereatyp padtrymlivajuć čynoŭniki, a kali sami akazvajucca ŭ turmie, to žachajucca ad miascovaj miedycyny. Pry ŭsim pry hetym daktary sprabavali zastacca daktarami».
«Adna ad hałavy, druhaja – ad žyvata»
«Turemnaja miedycyny – reč vielmi śpiecyfičnaja», — kaža sustaršynia Chryścijanskaj demakratyi, palitviazień Pavieł Sieviaryniec.
U jaho padčas źniavoleńnia byŭ zaščemleny nierv na śpinie.
«Na Akreścina jość taki sumny žart, blizki da praŭdy. Kali prychodzić lekar, to jon razłomvaje tabletku na dźvie častki. Adnu daje ad hałaŭnoha bolu, druhuju – ad žyvata. Na «sutkach» vielmi mała što jość ź lekaŭ. Kali sapraŭdy ŭźnikajuć prablemy, to vyklikajuć daktaroŭ z chutkaj dapamohi.
U «amierykancy» ŭsiu infarmacyju, što zapisvali miedyki, chavali ad vačej samoha pacyjenta. Jon niešta piša, ale pry hetym prykryvaje ŭsio rukoj. Kali pytaješsia, što pišuć, to čujecca adkaz: «My robim usio, što treba».
Prychodziš da takoha doktara, nibyta i ŭśmieška ŭ jaho na tvary, ale pry hetym adčuvańnie, što trapiŭ da inkvizitara. Pryhniatajučaja atmaśfiera, pry hetym z taboj nichto nie havoryć».
«Sočać, kab nie zahnuŭsia»
Paet, kandydat u prezidenty Uładzimir Niaklajeŭ trapiŭ u SIZA KDB paśla źbićcia. Kadr jahonaha apuchłaha ad udaru tvaru ablacieŭ paŭśvietu.
«Z majho dośviedu staŭleńnie takoje: žyvy čałaviek – dobra, pamior – dyk usie pamirajuć.
U «amierykancy» była niejkaja epidemija. Usie kamiery dušylisia ad kašlu. Pryčym, heta była nie prastuda. Ale nichto ničoha nie rabiŭ. Zaviaduć u miedpunkt dy daduć aśpirynu, voś i ŭsio. Sačyli tolki, kab nie zahnuŭsia».
«U mianie było niekalki hipiertaničnych kryzaŭ, - kaža Niaklajeŭ. – Dyk nie viedali, što rabić. Vyklikali daktaroŭ z cyvilnaha špitala. Kali ŭ nastupny raz zdaryŭsia kryz, to pabačyli, što budzie «žmuryk», tak jany na svaim žarhonie niabožčykaŭ nazyvajuć. Zabrali ŭnačy ŭ mašynu dy pavieźli niekudy za horad. Heta navat nie špital byŭ, a niejkaja łabaratoryja, dzie ekśpierymienty rabili. Try dni mianie tam trymali».
«NNP: Umovy tam byli ludskimi?
UN: Jakija ludskija? Dva čałavieki ŭ maskach pry mnie siadzieli. Adzin la hałavy, druhi – u nahach. Va ŭsim čornym, nibyta mahiłu pryjšli mnie kapać. A lačeńnie? Niešta ŭsio kałoli i kałoli. Špihavali mianie niečym, kab nie pamior.
Uładzimir Niaklajeŭ zhadvaje aniekdatyčny vypadak, jaki adbyŭsia ź im u «amierykancy».
«Vyrašyli, što maje kryzy źviazanyja ź ciažkim psichałahičnym stanam, voś i zaprasili psichołaha, kab jon mianie supakoiŭ. Čałaviek hety tak raschvalavaŭsia, što ja jaho bolš supakojvaŭ, čym jon mianie», – śmiajecca lidar «Havary praŭdu».
«Ni pra što z daktarami ja nie razmaŭlaŭ, jany maŭčali. Ni proźviščaŭ, ni imionaŭ ich nie viedaju. Tolki adzin byŭ prystojny čałaviek.
Kali ja spytaŭsia, jak jaho nazyvać, to adkazaŭ – Ajbalitam. Jon vykonvaŭ svaje funkcyi vielmi prafiesijna i pa-ludsku. Takija prystojnyja ludzi, niezaležna ad sistemy, jość i siarod achoŭnikaŭ, i śledčych, i kanvairaŭ. Byŭ taki i siarod miedykaŭ. Doktar Ajbalit».
Doktar Jozef Mienhiele
Doktar-nacyst, jaki ździekavaŭsia ź viaźniaŭ łahiera Aśviencym. Jon asabista vybiraŭ ludziej dla svaich złačynnych dośledaŭ. Achviarami Mienhiele stali niekalki dziasiatkaŭ tysiač čałaviek. Viaźni nazyvali jaho «Aniołam śmierci». Paśla vajny Mienhiele ŭciok u Paŭdniovuju Amieryku, dzie jaho tak i nie zmahli vysačyć.
***
Jak stała viadoma ŭ piatnicu, 27 vieraśnia, adnosna fielčara minskaha SIZA №1, jaki dziažuryŭ u noč śmierci Ihara Pcičkina, raspačata kryminalnaja sprava pavodle častki 2 artykuła 162 (nienaležnaje vykanańnie prafiesijnych abaviazkaŭ miedrabotnikam, što paciahnuła za saboj pa nieaściarožnaści śmierć pacyjenta).U vypadku, kali vina fielčara budzie dakazanaja, jamu moža pahražać da 5 hadoŭ pazbaŭleńnia voli.
Žychar Minska Ihar Pcičkin pamior na «Vaładarcy» 4 žniŭnia. Jaho śmierć nastupiła paśla taho, jak jon pravioŭ u SIZA 4 dni. Maskoŭski rajonny adździeł Śledčaha kamiteta viadzie pravierku pa fakcie śmierci Ihara Pcičkina.
4 vieraśnia termin praviadzieńnia pravierki padoŭžany da 4 listapada 2013 hoda. Dahetul svajakam aficyjna nie paviedamili pryčynu śmierci Ihara.