«Jon bajaŭsia navat ukołaŭ, jaki jon narkaman?!» Svajaki pamierłaha ŭ SIZA chłopca buduć patrabavać ekshumacyi cieła

Kali Žanna Pcičkina daviedałasia, što jaje syn pamior u SIZA № 1, jana ŭsiu noč hladzieła videa ź viasiella dački. Na im Ihar zaprasiŭ mamu tančyć u pieršy i apošni raz u žyćci, piša tut.by.

— Heta jon mianie ŭhavaryŭ. Ja nie ŭmieju tancavać ... Tut ja jamu kažu: «Synulka, ja ciabie tak lublu». Voś jon ciapier mianie padymie ... Ja jaho tut abdymaju, — kamientuje videa maci, jakaja ŭčora pachavała syna.

Zamiest aryštu Ihar moh atrymać štraf, ale nie zachacieŭ płacić «hetaj dziaržavie»

Žanna raspaviadaje, što baćka Ihara pamior, kali chłopčyku było šeść hadoŭ. Jaho i siastru maci vychoŭvała adna.

— Uvieś čas była pry ich. Jak ich adpuścić? A raptam aby što zrobiać i ŭ turmu siaduć? Ja bajałasia turmy, jak ahniu, — kaža jana, siedziačy na padłozie svajoj kvatery.

Pa słovach maci, chłopiec skončyŭ 9 kłasaŭ i ŭ 16 hadoŭ pajšoŭ pracavać na traktarny zavod. Spačatku byŭ vučniem, transparciroŭščykamŭ, a zatym akumulatarščykam. Na hetym zavodzie ciapier pracuje sama Žanna, da dekretnaha adpačynku pracavała i dačka Iryna.

Prykładna hod tamu Ihar z zavodu zvolniŭsia z-za maleńkaha zarobku (5 młn rubloŭ) i ŭładkavaŭsia miechanikam u pryvatnuju firmu. Tam zarablaŭ pa 8-10 młn rubloŭ.

Z 14 hadoŭ Ihar vadziŭ mašynu

— Ja kupiła «Holfika». Jamu (Iharu. — TUT.BY) tady było 14 hadoŭ, jon sieŭ i adrazu pajechaŭ. Na pravy pajšoŭ vučycca ŭ 17 hadoŭ i roŭna praz try dni paśla paŭnalećcia ich atrymaŭ. Jon lubiŭ mašyny. Žyć bieź ich nie moh, — raspaviadaje Žana.

U 2011 hodzie chłopca pazbavili prava kiravańnia transpartnym srodkam na piać hadoŭ i dali štraf 10.500.000 rubloŭ.

— Heta było 30 śniežnia. Jon razam sa znajomym ramantavaŭ mašynu ŭ haražy. Viartaŭsia dadomu vypiŭšy. Nie sastupiŭ darohu, i ŭ jaho ŭrezałasia druhaja mašyna ... Tak pravoŭ i pazbavili. 3 młn štrafu jon vypłaciŭ, a 7.500.000 da hetaha času pavinien, — raspaviadaje Žanna.

Pavodle jaje słoŭ, paśla rašeńnia suda prajšło dva hady i try miesiacy. Praz try miesiacy chłopcu abiacali viarnuć pravy za dobryja pavodziny. Ale ŭ sakaviku hetaha hoda jon znoŭ sieŭ za rul.

— Spačatku ja jechała za rulom, ale išoŭ śnieh, zajechała ŭ hurbu śniehu — i mianie pačało treści. Za rul sieŭ Ihar — i adrazu DAI spyniła, — raspaviadaje niaviesta chłopca Hanna Šparyk.

Da suda pa hetym parušeńni chłopca jašče raz zatrymali za rulom u krasaviku.

— Ja spaźniałasia na zaniatki va ŭniviersitet, pajechała na mašynie, a dadomu aŭtamabil viartaŭ Ihar, — kaža Hanna.

U vyniku ŭ mai hetaha hoda Ihara Pcičkina prysudzili da troch miesiacaŭ administracyjnaha aryštu pa art. 417 KK za nievykanańnie rašeńnia suda ab pazbaŭleńni prava zajmać peŭnyja pasady abo zajmacca peŭnaj dziejnaściu. Jaho maci kaža, što zamiest aryštu jon moh zapłacić 80 młn rubloŭ štrafu. Takich hrošaj u siamji nie było.

— Jon skazaŭ, što nie choča płacić hetaj dziaržavie 80 młn, — kaža jana.

Tak jak chłopiec pavinien byŭ pravieści try miesiacy ŭ turmie, z pracy jon zvolniŭsia, padpracoŭvaŭ na budoŭlach, razhružajučy miachi, i čakaŭ, kali ŭčastkovy skaža jechać u SIZA ... Uviečary 30 lipienia maci i siastra pravodzili chłopca da RUUS. Pry im byli dźvie sumki rečaŭ i praduktaŭ.

«Niachaj kažuć, što jon pamior ad sardečnaha prystupu ... Ale što, serca biła jaho znutry?»

Ihar žyŭ u dvuchpakajovaj kvatery razam ź niaviestaj, mamaj, ciažarnaj siastroj, jaje dziciem i mužam. Tolki niadaŭna pierajechaŭ sa svajoj budučaj žonkaj u asobnuju kvateru i tam pražyŭ dva tydni. Žanna kaža, što kali b jon užyvaŭ narkotyki, jak vykazali zdahadku ŭ SIZA № 1, jany b zaŭvažyli.

— U jaho navat svajho pakoja niama! — kaža siastra zahinuŭšaha Iryna Pcičkina. — Jon usio žyćcio bajaŭsia ŭkołaŭ. Zuby nie lačyŭ tolki z-za taho, što abiazbolvalnyja kałoli.

Maci raspaviadaje, što i ałkahol Ihar ŭžyvaŭ nie časta — «jak usie, u kampanii».

— Jakija mahli być zapoi, kali jon uvieś čas pracavaŭ? — pytajecca jana. — Ja ŭsiu jaho kampaniju viedała. Jany ŭ mianie i načavali, kali vypivali. Ja pa žyćci nikoli nie piła, tamu što ź dziacinstva viernica. Na heta hladzieła sa ślaźmi i pytałasia ŭ jaho: «Što ty robiš?» Vy bačycie, što ŭ mianie kvatera nie jak u ałkaholikaŭ? Usie jaho siabry b vam skazali, što takich dobrych ludziej, jak jon, redka sustrenieš. Jon i nie biŭsia ŭ dziacinstvie nikoli.

4 žniŭnia ŭ 11.10 Žańnie Pcičkinaj patelefanavali ź SIZA № 1 i paviedamili, što jaje syna bolš niama. Pieršaj na apaznańnie cieła, uskryćcio jakoha pravali biez zhody rodnych, u morh pajechała siastra Iryna.

— Niachaj kažuć, što jon pamior ad sardečnaha prystupu ... Ale što, serca biła jaho znutry? — pytajecca Iryna, pakazvajučy fatahrafii z hiematomami i siniakami na ciele Ihara. — Pravaja ruka była siniaja, jak śliva, a levaja — apuchłaja. Majo mierkavańnie, što jaho padviešvali, tamu ruka i apuchła.

— My dumajem, što ŭ jaho ruki byli pierałamanyja, — kaža maci. — A na nazie jość ślady ad ukołaŭ.

U morhu rodnym razam ź ciełam addali asabistyja rečy Ihara: majtki, škarpetki, spartyŭnyja štany i švedar. Taksama dali dakumient, dzie napisana, što pryčyna śmierci vyśviatlajecca. Pa słovach Žanny, u morhu jana daviedałasia ŭ supracoŭnikaŭ, što pamierłych ź SIZA № 1 siudy pryvoziać časta.

Kali maci i siastra byli na pryjomie ŭ načalnika SIZA № 1, jon vykazaŭ zdahadku, što ŭ Ihara pačałasia narkatyčnaja łomka i jaho daviałosia supakojvać.

— Kali ŭjavić, što jon byŭ narkamanam i ŭ jaho pačalisia demany ... Niaŭžo jaho treba za heta zabivać? Ci mieli prava jany jaho supakojvać? Jany skazali, što adpravili ŭ sančaść ... Tam razam ź im jašče było dva čałavieki. Jak dobra, što tam byli ludzi. Jany vyjduć z turmy, ja ź imi pahavaru, — abiacaje maci.

— Adkul stolki žorstkaści ŭ ludziach? Dapuścim, što jaho źbili ... Bo ŭ hetych ludziej taksama napeŭna jość dzieci i žonki ... Navat kali ŭ vychavaŭčych metach bili. Navošta katavali? Za što? — pytajecca siastra.

7 žniŭnia ź izalatara Žanna zabrała astatnija rečy syna: dva ručniki, try majki, švedar, majtki, škarpetki, šłapaki, haspadarčaje myła, tualetnuju papieru, kipiacilnik, cukierki, krem paśla haleńnia, kanvierty i sšytak, cyharety, časnyk, pierac, łokšynu chutkaha pryhatavańnia. U hety ž dzień Iryna napisała zajavu ŭ SK pra toje, što budzie davać pakazańni tolki ŭ prysutnaści advakata, paprasiła miedycynskaje apisańnie taho, jak pamiraŭ jaje brat, a taksama pravieści pravierku pa fakcie paškodžańniaŭ na jaho ciele.

Taksama rodnyja kažuć, što buduć patrabavać ekshumacyi cieła.

• 0
• 0
• 0
• 0
• 0
• 0