Eks-palitviaźniu Alinieviču inkryminujuć padpały ŭ Salihorsku i Mazyry. Pakarańnie až da rasstrełu
31.10.2020 / 14:25
Pra heta piša blizki da śpiecsłužbaŭ telehram-kanał «Žiołtyje ślivy». Apublikavana videa dopytu anarchista Duboŭskaha.
Duboŭski tłumačyć, što jon i Alinievič žyli za miažoj, ale vyrašyli pryjechać u Biełaruś, kab paŭdzielničać u supracivie. U pačatku kastryčnika jany praź les pierajšli ŭkrainska-biełaruskuju miažu.
Na terytoryi Biełarusi jany sustrelisia jašče z dvuma anarchistami — heta byli H. Razanovič i S. Ramanaŭ. Učaćviarych vyrašyli atakavać budynki siłavych viedamstvaŭ.
Čytajcie taksama: Na BT kazali, što jon rychtavaŭ terakt na 3 Lipienia. Homielski anarchist Siarhiej Ramanaŭ raspavioŭ pra zatrymańnie z vybuchoŭkaj i žyćcio ŭ kałonii
U jakaści pieršaj celi abrali Salihorsk, tut kinuli kaktejli Mołatava ŭ budynki Dziaržaŭnaha kamiteta sudovych ekśpiertyz i prakuratury. Kala budynka prakuratury zaharelisia aŭtamabili.
Paśla lasami rušyli na poŭdzień krainy, urešcie apynulisia ŭ Mazyry. Tut byŭ atakavany budynak DAI.
Ni ŭ Salihorsku, ni ŭ Mazyry nivodny čałaviek nie paciarpieŭ.
U kancy kastryčnika anarchisty vyrašyli syści ź Biełarusi i byli zatrymanyja u Jelskim rajonie kala ŭkrainskaj miažy.
Ich dziejańni kvalifikavanyja pa č. 3 art. 289 KK jak akt teraryzmu, učynieny arhanizavanaj hrupaj. Sankcyja hetaha artykuła — pazbaŭleńnie voli na termin ad dziesiaci da dvaccaci piaci hadoŭ, abo pažyćciovaje źniavoleńnie, abo śmiarotnaje pakarańnie.
U pačatku 2010-ch Alinieviču inkryminavali napad na rasijskaje pasolstva, Hienštab, kazino «Šanhry Ła», na ofis banka «Maskva-Minsk» i CIP na Akreścina. Jaho sudzili pa artykułach 339 (Chulihanstva, ździejśnienaje hrupaj asob) i 218 Kryminalnaha kodeksa (Paškodžańnie majomaści niebiaśpiečnym sposabam i ŭ asabliva bujnym pamiery). Jon byŭ prysudžany da 8 hadoŭ źniavoleńnia, ale pamiłavany praz 5 hadoŭ.
Pravaabaroncy tady zajavili, što choć Alinievič i ździejśniŭ złačynstva, sud adbyvaŭsia z šeraham parušeńniaŭ, a rašeńnie pa spravie było palityčna matyvavanym.