Łukašenka abmierkavaŭ z hienieralnym sakratarom AAN pytańni vyvazu zbožža z Ukrainy i pastaviŭ svaje ŭmovy
Łukašenka i Antoniu Huteryš praviali siońnia telefonnuju razmovu, abmierkavaŭšy najbolš aktualnyja pytańni paradku dnia i asobna spyniŭšysia na pytańni vyvazu zbožža z terytoryi Ukrainy, paviedamlaje BiełTA.
03.06.2022 / 13:54
Łukašenka vyrazna abaznačyŭ pazicyju pa hetaj temie: Biełaruś hatovaja da pastavak ukrainskaha zbožža ŭ bałtyjskija party praz terytoryju Biełarusi.
Taksama Biełaruś hatovaja akazvać usialakuju dapamohu pa jaho pieravałcy biełaruskim čyhunačnym transpartam, vydzieliŭšy dla hetaha nieabchodnyja mahutnaści.
«Alaksandr Łukašenka prapanavaŭ hienieralnamu sakrataru AAN za stałom pieramoŭ z udziełam pradstaŭnikoŭ Biełarusi, Ukrainy i krain Bałtyi (hatovych dać party) urehulavać prablemy ŭ hetym pytańni», — adznačaje BiełTA.
«Pry hetym hałoŭnaje, jak było paznačana ŭ razmovie, kab hetyja party (Hiermanii, Polščy, bałtyjskich krain, Rasii) byli adkrytyja i dla biełaruskich tavaraŭ. Heta značyć, kab, stvaryŭšy ŭmovy dla tranzitu ŭkrainskaha zbožža, u partach, jakija buduć ažyćciaŭlać jaho pieravałku, była mahčymaść hruzić i tavary ź Biełarusi», — adznačaje BiełTA.
Antoniu Huteryš paprasiŭ nievialikuju paŭzu ŭ niekalki dzion, kab pierahavaryć z kiraŭnictvam zacikaŭlenych krain i vyznačyć umovy pastavak na mižnarodnyja rynki ŭkrainskaha zbožža praz Respubliku Biełaruś.
Raniej Łukašenka źviartaŭsia da Huteryša ź listom pa pytańniach pastavak ukrainskaha zbožža praź biełaruskuju terytoryju.