Kali Kačanava apošni raz jeła kniedliki?
Natalla Kačanava, jakaja časta publična spačuvaje narodam Jeŭropy, u realnaści była tam paru razoŭ za žyćcio i vielmi daŭno. Pahladzieli, z čaho składajecca dośvied Kačanavaj pry razvahach ab zamiežžy.
22.07.2022 / 09:01
«Siońnia hladziš na dolu niekatorych krain — serca kryvioju ablivajecca ad spačuvańnia da ni ŭ čym nie vinavatych ludziej, jakija vymušanyja litaralna vyžyvać praź biazdumnuju palityku ich aficyjnaha kiraŭnictva. Stanovicca žudasna i horka ad adnoj tolki dumki, što mahło b być, kali b biełarusy i rasijanie zastalisia pry takim ža ŭradzie, jak u hetych krainach», — tolki adno ź niadaŭnich vykazvańniaŭ Natalli Kačanavaj pra harotnaje žyćcio za miažoj. Ale havoryć jana pra heta rehularna.
Moža być, jana daśviedčanaja vandroŭnica i na svaje vočy bačyła toje, pra što razvažaje?
Kačanavaj 61 hod. Upieršyniu za miažoj, pa jaje słovach, jana była ŭ 1989 hodzie.
«Cudoŭnaja kraina Juhasłavija! U kramach bahaćcie, pryhožaja kraina, ludzi, usio ŭ paradku, usio narmalnaje. Ale ŭ hety čas užo ŭ kinateatrach iduć parnahrafičnyja filmy, užo sychodzić duchoŭnaść i maralnaść. I praź niekalki hadoŭ usiu krainu prosta razbambili», — raskazvała Kačanava ŭ adnym ź intervju.
Jak vynikaje z danych uzłamanaj bazy «Pasažyrapatok», za miažu čynoŭnica vyjazdžała paśla ŭ 2006-m, va ŭzroście 46 hod — dva tydni praviała ŭ Čechii. Tut, praŭda, mohuć być niedakładnaści adnosna bolš raniejšych časoŭ, bo baza «Pasažyrapatok» viadzie ŭlik z 2004 hoda.
Praz dva hady, u 2008-m, Kačanava dajechała da Łatvii — pabyła dva dni, jašče praz hod znoŭ źjeździła tudy ž — viarnułasia nazad u dzień vyjezdu. Sukupna ŭ Łatvii, krainie ES, Kačanava praviała čatyry dni. U Čechii — dvaccać čatyry.
Dva razy za žyćcio Kačanava była va Ukrainie — pa dva tydni. Apošni raz u 2013-m, da Majdanu, u vyniku jakoha prarasijskaje kiraŭnictva krainy ŭciakło ŭ Rasiju.
U 2017-m čynoŭnica źlatała ŭ Kazachstan.
Što admietna, pajezdki ŭ Rasiju jak u zamiežža ŭ bazie nie ŭličvajucca.
U 2010-m Kačanava znoŭ naviedvała Čechiju, dzie praviała 4 dni.
Apošniaja pajezdka Kačanavaj u krainu ES adbyłasia 11 hod tamu, u 2011-m. Jana jeździła ŭ Łatviju na dzień.
Vierahodna, ź vizitam u Jeŭropie čynoŭnica budzie jašče nie skora — paśla falsifikacyj i represij 2020-2021 hadoŭ jana stała piersonaj non hrata ŭ raźvitych krainach.