Pakul Rasija zachoplivaje ziemli, handal pamiž Kitajem i ZŠA bje ŭsie rekordy
Štaty i Padniabiesnaja zastajucca vielmi ŭzajemazaležnymi.
10.02.2023 / 21:10
Fota: AP Photo/Eric Risberg
U 2022 hodzie dvuchbakovy tavaraabarot pamiž ZŠA i Kitajem pieravysiŭ rekordnyja 690 miljardaŭ dalaraŭ. Pra heta 7 lutaha paviedamiła vydańnie Politico sa spasyłkaj na śviežuju infarmacyju ad Ministerstva handlu ZŠA.
Takija vysokija pakazčyki byli dasiahnutyja, niahledziačy na napružanyja palityčnyja adnosiny pamiž dźviuma krainami.
Jak piša vydańnie, heta stała vynikam postkavidnaha suśvietnaha handlovaha ŭsplosku, i nie tolki Kitaj, ale i ZŠA dasiahnuli novaha maksimumu ŭ handli ź inšymi 90 krainami śvietu na čale ź Mieksikaj, Kanadaj i Japonijaj. Adnak amierykana-kitajski vypadak admietny tym, što handal pamiž dźviuma krainami praciahvaje raści na fonie prykładańnia vialikich namahańniaŭ z abodvuch bakoŭ pa pamianšeńni zaležnaści adno ad adnaho.
«Rašeńni spažyŭcoŭ i biznesu ŭsio jašče daminujuć nad intaresami ŭradaŭ. Abmiežavańni prytoku tavaraŭ nie majuć pieravažnaha ŭpłyvu, ci, prynamsi, dahetul nie mieli», — skazaŭ Ed Hreser, były pamočnik pradstaŭnika ZŠA pa handlovaj palitycy i ekanomicy.
Niahledziačy na žadańnie ZŠA «ssadzić» ekanomiku z kitajskaj ihołki, impart kitajskich tavaraŭ u krainu ŭ 2022 hodzie skłaŭ amal 540 młrd dalaraŭ (amal 1,5 tryljona biełaruskich rubloŭ). A ekspart u Kitaj skłaŭ 153,8 młrd dalaraŭ (krychu bolš za 400 młrd bieł. rub.).
Prytym jon u asnoŭnym składaŭsia ź sielskahaspadarčych tavaraŭ, što robić amierykanskich fiermieraŭ i adpaviednyja kampanii adnymi z hałoŭnych prychilnikaŭ supracoŭnictva z Kitajem.
«Ja dumaju, što razryŭ z Kitajem byŭ by žachlivaj pamyłkaj. Što sapraŭdy treba zrabić, dyk heta zabiaśpiečyć zachavanaść našych intelektualnych pravoŭ, kamiercyjnych tajamnic dy inšaj stratehična važnaj infarmacyi», — paviedamiŭ vydańniu Džon Bod, prezident amierykanskaj Asacyjacyi pierapracoŭščykaŭ kukuruzy (CRA) i člen Kaalicyi fiermieraŭ za svabodny handal.
Zamiest poŭnaj admovy ad kitajskaha rynku mnohija amierykanskija kampanii raspracoŭvajuć stratehiju «Kitaj+1», jakaja maje na ŭvazie častkovy abo poŭny pieranos vytvorčaści na susiednija z Kitajem krainy dla zachavańnia łahistyčnych łancužkoŭ i intelektualnaj ułasnaści.
Nahadajem, što mienavita heta stała padstavaj dla pačatku handlovaj vajny pamiž ZŠA i Kitajem jašče ŭ 2018 hodzie padčas prezidenctva Donalda Trampa, jakaja zakranuła dvuchbakovy tavaraabarot na sotni miljardaŭ dalaraŭ.
Pačałasia jana z pryčyny taho, što kitajskaja praktyka dopusku zamiežnych kampanij da svajho rynku zmušaje apošnich dzialicca svajoj intelektualnaj ułasnaściu, što dazvalaje Kitaju kapijavać zamiežnyja technałohii roznaha pryznačeńnia. Administracyja ciapierašniaha prezidenta ZŠA Džo Bajdena ŭ svaju čarhu zachoŭvaje hetu tendencyju Trampa pa kantroli ekspartu amierykanskich technałohij u Kitaj, jakija asabliva tyčacca vajskovaj śfiery.
Niadaŭniaje zdareńnie z kitajskim aerastatam-špijonam u pavietranaj prastory ZŠA, letni vizit byłoha śpikiera amierykanskaj Pałaty pradstaŭnikoŭ Nensi Pełasi na Tajvań vyklikali vialikija emocyi ŭ dźviuch krainach. Ale Kitaj pakazalna ŭstrymaŭsia pry hałasavańniach u AAN ab uvarvańni Rasii va Ukrainu. I, što samaje važnaje, nie pastaŭlaje ŭ Rasiju ŭzbrajeńniaŭ.