Minzdaroŭja ŭviało novyja praviły dla aptek. Ich stanie mienš: chočuć prydušyć kankurentaŭ «BiełFarmacyi»
Ministerstva achovy zdaroŭja ŭniesła źmieny ŭ «Naležnuju aptečnuju praktyku», jakija mohuć istotna abmiežavać dziejnaść kamiercyjnych aptek.
23.02.2023 / 21:24
Z 1 sakavika ŭ haradach i pasiołkach nielha budzie adkryć nievialikija apteki ci kijoski, kali tam niama hałaŭnoj apteki.
Pra heta havorycca ŭ pastanovie Ministerstva achovy zdaroŭja, jakoj uniesienyja źmieny ŭ inšuju pastanovu ad 27 śniežnia 2006 hoda (№120). Jana zakranaje dziejnaść aptek pieršaj, druhoj i piataj katehoryj. Pastanova była pryniataja 20 studzienia 2023 hoda, a ŭčora na sajcie ministerstva apublikavali tłumačeńnie da jaje.
Pieršaja i druhaja katehoryi — heta hałaŭnyja (vialikija) apteki. A apteki piataj katehoryi — drobnyja, im zvyčajna advodzicca nievialiki zakutok u handlovych centrach, na vakzałach, rynkach ci stavicca šapik. Ciapier, zhodna z novaŭviadzieńniem, nieabchodna spačatku adkryć apteku pieršaj ci druhoj katehoryj i tolki paśla dazvalajecca piataj katehoryi.
«Raźmiaščać vialikija kamiercyjnyja apteki ŭ nievialikich haradach niavyhadna, tamu, naprykład, u Vałožynie ci Łojevie kali nie budzie hałaŭnoj apteki, to i jaje filijałaŭ taksama nie budzie», — vykazvaje svajo bačańnie hetych źmien zahadčyca adnoj z kamiercyjnych aptek.
Takoje patrabavańnie nabudzie moc dla aptek, stvoranych paśla 1 sakavika 2023 hoda.
Z 1 červienia 2023 hoda kamiercyjnym aptekam piataj katehoryi (a mnohija z kamiercyjnych aptek adnosiacca da hetaj kateryi) dazvolać pradavać tolki biezrecepturnyja lekavyja preparaty.
«Heta nie asnoŭny dachod kamiercyjnych aptek, bo bolšaść lekaŭ biezrecepturnyja. Adnak hałoŭnaje ź pieraliku taho, što my nie možam pradavać — heta žyćciova važnyja recepturnyja preparaty, jakija nie vyrablajucca ŭ Biełarusi i jakija vypisvajucca lhotna. Ludzi takija leki kuplali, dzie znachodzili, kali ich nie było ŭ «BiełFarmacyi». Pryjazdžali navat pa ich i rasijanie», — raskazvaje aptekarka.
Pa jaje słovach, abmiežavańni pryviaduć da źmianšeńnia dachodu kamiercyjnych aptek. Stratnyja apteki pačnuć začyniacca.
«Raźlik na toje, što rabotniki kamiercyjnych aptek — pravizary, farmaceŭty — pojduć z kamiercyjnych u dziaržaŭnyja apteki. Takim čynam Ministerstva achovy zdaroŭja spadziajecca vyrašyć pytańnie z kadrami», — miarkuje zahadčyca apteki.
Pa jaje słovach, minułaj vosieńniu «na roznych naradach čynoŭniki zapeŭnivali, što chutka budzie pryniataje novaje pałažeńnie, u vyniku jakoha jany kadravyja pytańni vyrašać i ŭ ich budzie dastatkovaja kolkaść farmaceŭtaŭ i pravizaraŭ».
Na 23 lutaha, zhodna z nacyjanalnym bankam vakansij, ustanovam achovy zdaroŭja nie chapała 235 pravizaraŭ. Amal usie zajaŭki z vakantnymi miescami — ad «BiełFarmacyi». U Biełarusi bolš za 3500 aptek. Kolkaść kamiercyjnych i dziaržaŭnych aptek prykładnaja roŭnaja.