U Minsku nie chapaje 3500 miedykaŭ, a ŭ Polšču za hod pierajechała stolki, što chapiła b ukamplektavać usie lakarni Brestčyny
Balnicy i palikliniki majuć patrebu ŭ bolš jak 8 tysiačach miedrabotnikaŭ. A za apošni hod tysiača biełaruskich daktaroŭ pracaŭładkavalisia ŭ Polščy.
Jak u rehijonach?
Zhodna z nacyjanalnym bankam vakansij, u krainie šukajuć 4614 daktaroŭ-śpiecyjalistaŭ, 3607 miedsiaścior, 2209 sanitaraŭ.
Ustanovam achovy zdaroŭja Minskaj vobłaści patrabujecca 1592 rabotniki.
Na Viciebščynie ź miedyčnymi kadrami lepiej, ale nie našmat. Nie chapaje 966 daktaroŭ, miedsiaścior i sanitaraŭ. Ustanovy achovy zdaroŭja Mahiloŭščyny nie ŭkamplektavanyja 738 miedrabotnikami.
«Za ŭsimi hetymi ličbami staić čałaviečaje zdaroŭje i žyćci»
«Vialiki adtok kadraŭ pryznajecca i čynoŭnikami. Miedyki vučać movu i zjazdžajuć», — kaža pra situacyju miedyk z Babrujska.
Niekatoryja z surazmoŭcaŭ źviazvajuć niedachop kadraŭ z padziejami 2020 hoda. Na pratesty ŭ Minsku i zachodnich abłaściach vychodziła bolš miedykaŭ, jakija pa zadušeńni pratestaŭ vymušanyja byli zjazdžać uśled z ajcišnikami. Akcentujuć uvahu surazmoŭcy i na inšych akaličnaściach.
Vyrašeńnie prablemy pavodle Łukašenki: «My ciabie rychtavali — adpracuj 10 hadoŭ»
Čynoŭniki nastojvajuć, što pa rehijonach ukamplektavanaść kadrami nieadnarodnaja. Lepšaja situacyja ŭ Bresckaj i Hrodzienskaj abłaściach. Prablemy z kadrami majuć lakarni Viciebščyny, Mahiloŭščyny, Minščyny dy stalicy. Ale źviestki Dziaržaŭnaj słužby zaniataści śviedčać, što situacyja ź miedrabotnikami va ŭschodnich rehijonach vyhladaje lepiej.
Letaś Łukašenka nastaŭlaŭ kiraŭnika Ministerstva achovy zdaroŭja Dźmitryja Pinieviča, kab toj padrychtavaŭ prapanovu ab abaviazkovaj 10-hadovaj adpracoŭcy raźmierkavańnia vypusknikami miedycynskich vučelniaŭ.
«Ty mnie maješ unieści ŭ novym hodzie prapanovu. Pryjšoŭ va ŭniviersitet vučycca — pryjšoŭ, skončyŭ. My ciabie rychtavali — adpracuj 10 hadoŭ. Nam treba pastavić usie kropki nad «i», — patrabavaŭ Łukašenka.
Tak, naprykład, zrabiła Polšča. U joj z 2021 hoda zamiežny miedyk moža pracavać pa śpiecyjalnaści piać hadoŭ, a za hety čas jon abaviazany zdać nieabchodnyja ispyty, kab paćvierdzić kvalifikacyju dla atrymańnia licenzii.
Adtok miedyčnych kadraŭ spynicca tolki tady, kali zabaroniać vyjezd z krainy naohuł, ličać daktary. Pavodle ich, nijakija čynoŭnickija ŭmovy nie dapamohuć. Situacyja z deficytam miedyčnaha piersanału čynoŭnikaŭ nie chvaluje.
Kamientary