Joźviak: Za vyvad biełaruskaha kałiju z-pad sankcyj vystupajuć Partuhałija, Bielhija, Niderłandy i Francyja
Karespandent «Radyjo Svaboda» ŭ Brusieli Rykard Joźviak, viadomy svaimi insajdarskimi suviaziami, daŭ intervju biełaruskaj słužbie «Radyjo Svaboda», u jakim padzialiŭsia tym, što jamu viadoma adnosna taho, jak u kułuarach struktur Jeŭrasajuza viaducca dyskusii adnosna sankcyj suprać biełaruskaha kałiju.
23.02.2023 / 22:11
Na vyklučeńni biełaruskich kalijnych uhnajeńniaŭ z novaha sankcyjnaha pakieta ES nastojvajuć Bielhija, Niderłandy, Francyja i Partuhałija, paviedamiŭ Joźviak. Klučavuju rolu tut ihraje Partuhałija, jakaja pravodzić u Jeŭropie intaresy svajoj byłoj kałonii, Brazilii. Hetym samym Joźviak pacvierdziŭ učarašniuju infarmacyju na hety kont «Našaj Nivy».
AAN i Braziłija praz Partuhałiju łabirujuć vyvad Huceryjeva i Hałavataha z-pad sankcyj
Joźviak śćviardžaje, što ŭ pytańni ź biełaruskim kałijem Jeŭropa prysłuchoŭvajecca da biednych, adnak palityčna ŭpłyvovych krain Paŭdniovaha paŭšarja, jakija zajaŭlajuć pra niebiaśpieku hoładu ŭ vypadku niedachopu ŭhnajeńniaŭ. I heta surjozny arhumient.
Taksama Joźviak paŭtaryŭ svoj raniejšy davoli skandalny tezis pra toje, što ES u sankcyjnym płanie stavicca da Biełarusi bolš miakka, čym da Rasii, bo hetaha prosić aficyjny Kijeŭ. Ukraincy nie chočuć, kab Łukašenka bolš aktyŭna ŭklučyŭsia ŭ vajnu i nie chočuć jaho pravakavać, a Brusiel da ich u hetym płanie prysłuchoŭvajecca.
U novym sankcyjnym pakiecie, jaki ciapier rychtujecca, pa słovach Joźviaka, najbolš pryncypova pakinuć u sile sankcyi suprać biełaruskaha kałiju dla Litvy, bo ŭ advarotnym vypadku jaje ŭłady mohuć čakać unutrypalityčnyja nastupstvy. Urešcie ž daviadziecca iści na niejki kampramis, ale jak jon budzie vyhladać, žurnalist-insajdar nie viedaje.