Va Ukrainie asudzili biełarusa-vahnieraŭca. Jon pajšoŭ na pahadnieńnie ab pryznańni viny i paźbieh maksimalnaha terminu
Adzin z sudoŭ Danieckaj vobłaści Ukrainy asudziŭ uziataha va ukrainski pałon hramadzianina Biełarusi Andreja Hieryłoviča, jaki vajavaŭ u składzie hrupoŭki «Vahnier», na 9 hadoŭ pazbaŭleńnia voli, paviedamlaje «Radyjo Svaboda».
16.03.2023 / 16:39
Skrynšot videazapisu t.me/operativnoZSU
Termin adbyvańnia pakarańnia budzie adličvacca z 13 lutaha 2023 hoda.
Andreja Hieryłoviča asudzili pavodle č. 4 artykuła 447 Kryminalnaha kodeksa Ukrainy, jaki praduhledžvaje pakarańnie za ŭdzieł u jakaści najmita va ŭzbrojenym kanflikcie, vajennych abo hvałtoŭnych dziejańniach, u vyhladzie pazbaŭleńnia voli na termin ad 5 da 10 hadoŭ.
Pierad vyniasieńniem pryhavoru Hieryłovič dobraachvotna padpisaŭ sa śledstvam pahadnieńnie ab pryznańni svajoj viny, što dazvoliła jamu paźbiehnuć maksimalnaha pakarańnia. U toj ža čas, u vypadku, kali hramadzianin Biełarusi parušyć hetaje pahadnieńnie, sud moža skasavać abvieščany pryhavor i vynieści novy.
U čas sudovaha razhladu spravy biełarus mieŭ svajho advakata i pierakładčyka z ukrainskaj na ruskuju movu.
U pryhavory adznačajecca, što Andrej Hieryłovič trapiŭ va ŭkrainski pałon 16 listapada 2022 hodu niepadalok ad pasiołka Kurdziumaŭka Bachmuckaha rajona Danieckaj vobłaści.
Sioleta ŭ studzieni pavodle hetaha ž artykułu asudzili jašče adnaho biełarusa, Maksima Ziaziulčyka. Jon atrymaŭ maksimalny termin u 10 hadoŭ.
Što viadoma pra Hieryłoviča
U materyjałach spravy Andreja Hieryłoviča adznačałasia, što jon 10 lipienia 2022 hoda pryjechaŭ na ciahniku z Homiela ŭ Krasnadar, a adtul na taksi dabraŭsia da vioski Molkina, dzie znachodzicca adzin z samych vialikich vajskovych palihonaŭ u Krasnadarskim krai. Mienavita tam nibyta znachodzicca trenavalny łahier i miesca pryjomu novych bajcoŭ u hrupoŭku «Vahnier».
U toj ža dzień biełarus padpisaŭ kantrakt z «Vahneram», pavodle jakoha jamu abiacali zarobak 240 tysiač rasijskich rubloŭ na miesiac i dadatkova 5 tysiač «palavych» vypłat.
Praz 10 dzion navučańnia na palihonie Andreja Hieryłoviča razam ź inšymi vahnieraŭcami pierakinuli ŭ Śvietładarsk Bachmuckaha rajona Danieckaj vobłaści. Pavodle ŭkrainskaha śledstva, z 21 lipienia jon udzielničaŭ u bajach kala Siamihorja, Kodemy i Atradaŭki ŭ Danieckaj vobłaści, a 16 listapada jaho ŭziali ŭ pałon ukrainskija vajskoŭcy.
Biełarus vajavaŭ pad pazyŭnym «Zaspa», jaki ŭziaŭ ad nazvy vioski Rečyckaha rajona, niepadalok ad jakoj jon naradziŭsia.
Raniej «Biełaruski rasśledavalnicki centr» paviedamlaŭ, što Hieryłovič naradziŭsia ŭ Zaśpie, adnak u materyjałach kryminalnaj spravy paznačałasia, što jon źjaŭlajecca ŭradžencam vioski Haroškaŭ, jakaja terytaryjalna adnosicca da Zaśpienskaha sielsavieta Rečyckaha rajona Homielskaj vobłaści.
Pavodle rasśledvalnickaha centra, paśla škoły Andrej Hieryłovič pracavaŭ u kałhasie, a potym słužyŭ praparščykam u bryhadzie suviazi vajskovaj častki 68473 u Kałodziščach. Paśla słužby pracavaŭ alpinistam-mantažnikam u pryvatnaj kampanii.
Padčas dasudovych śledčych dziejańniaŭ, jak paviedamlała Słužba biaśpieki Ukrainy, Andrej Hieryłovič daŭ śviedčańni ab vajennych złačynstvach rasijskich vojskaŭ i vajenizavanych hrupovak, pieradaŭ ustanoŭčyja źviestki asobaŭ, datyčnych da ich, a taksama raskazaŭ pra katavańni, pazbaŭleńnie hrašovaha zabieśpiačeńnia i zabojstvy za nievykanańnie złačynnych zahadaŭ.
Kiraŭnictva Biełarusi padtrymała ahresiju Rasii suprać Ukrainy i dazvoliła skarystać vajskovuju infrastrukturu i pavietranuju prastoru dla ŭvarvańnia rasijskaj armii i abstrełaŭ mirnych haradoŭ Ukrainy, achviarami jakich stali dziasiatki tysiač cyvilnych ukraincaŭ.
Čytajcie taksama: