Лекі Рыгору Кастусёву ўсё ж перадаём — паплечнікі
Крыху больш за два гады знаходзіцца за кратамі старшыня Партыі БНФ Рыгор Кастусёў. На гэтым тыдні яму споўнілася 66 год…
21.04.2023 / 11:40
Палітык быў затрыманы 12 красавіка 2021 года ў Шклове па справе аб «захопе ўлады». Яго абвінавацілі паводле арт. 357 КК — «Змова ці іншыя дзеянні, здзейсненыя з мэтай захопу дзяржаўнай улады».
5 верасня 2022 года суд прызнаў Рыгора Кастусёва вінаватым і прысудзіў яму 10 гадоў зняволення ў калоніі ва ўмовах узмоцненага рэжыму.
Напрыканцы мінулага году Міністэрства ўнутраных спраў дадало палітыка ў спіс асоб, «якія маюць дачыненне да экстрэмісцкай дзейнасці».
Адбывае пакаранне Рыгор Кастусёў у папраўчай калоніі №22 у Івацэвічах, якая вядома пад назвай «Воўчыя норы».
«У СІЗА ў Рыгора Кастусёва абвастрыліся праблемы са здароўем — у прыватнасці, выявілася анкалагічнае захворванне, — распавялі «Народнай Волі» паплечнікі і сябры палітыка. — Настойлівыя звароты адвакатаў з просьбай забяспечыць належнае медыцынскае абследаванне зняволенага плёну не маюць да гэтага часу.
З незразумелых прычын Рыгора пазбавілі спатканняў са сваякамі — апошняе здарылася ў СІЗА КДБ адразу пасля суда. Акрамя таго, яму істотна зменшылі суму атаваркі ў мясцовай краме.
Калі з ізалятараў лісты да жонкі даходзілі без моцных затрымак, то цяпер з гэтым праблемы. Няма дакладных звестак адносна таго, ці не намагаюцца яго прыцягваць да лагерных работ — асабліва з улікам пенсіённага ўзросту і медыцынскіх абмежаванняў.
Гэтак жа няма пэўнасці адносна фізічнага стану вязня. Нібыта ўжо з калоніі павінны былі адправіць на абследаванне ў лякарню, аднак, як вынікае з папярэдніх спробаў, вынікі агляду адміністрацыя папраўчай установы нікому не паведамляе».
Выконваючы абавязкі кіраўніка Партыі БНФ Вадзім Саранчукоў дадае, што ні ў яго, ні ў сяброў партыі таксама няма ніякіх наўпроставых кантактаў з Рыгорам Кастусёвым.
«Лісты, якія дасылаюць яму паплечнікі ў вялікай колькасці, як мы разумеем, не даходзяць, — кажа Вадзім Саранчукоў. — Таму любое атрыманне інфармацыі з таго боку ці наадварот, да яго вельмі абмежаванае.
Але ў нас атрымліваецца перадаваць лекі. Аб’ектыўнай інфармацыі няма, таму сказаць, у якім стане ён знаходзіцца зараз вельмі складана…»
«Настойваю на поўнай невінаватасці». Рыгор Кастусёў напісаў Лукашэнку адкрыты ліст
«Волі сцяг шчэ залунае, каб свабодзе, праўдзе быць». Рыгор Кастусёў даслаў верш з-за кратаў