Niemcy nie padtrymlivajuć čatyrochdzionny pracoŭny tydzień
26.04.2023 / 16:30
Ludzi nie vierać, što za čatyry dni možna paśpiavać vykonvać usie pracoŭnyja zadačy.
Apytańnie było praviedziena instytutam Forsa. Jano pakazała, što 55 pracentaŭ niemcaŭ vystupajuć suprać uviadzieńnia čatyrochdzionnaha pracoŭnaha tydnia z poŭnaj apłataj pracy. «Za» vykazałasia 42 pracenty.
Uviadzieńnie čatyrochdzionnaha tydnia z poŭnaj kampiensacyjaj zarabotnaj płaty prapanavała, u pryvatnaści, IG Metall. Prychilniki spasyłajucca na dośvied inšych jeŭrapiejskich krain, pavodle jakoha čatyrochdzionny tydzień źmianšaje nahruzku i pavialičvaje pradukcyjnaść.
Praciŭniki papiaredžvajuć, što kampanijam heta stvoryć dadatkovyja finansavyja ciažkaści. Druhi arhumient zaklučajecca ŭ tym, što nie zaŭsiody možna lohka raźmierkavać uvieś abjom pracy na mienšuju kolkaść pracoŭnych hadzin.
Naprykład, patrabavańnie IG Metall ab čatyrochdzionnym pracoŭnym tydni z takimi ž zarobkami ŭ mietałurhičnaj pramysłovaści sustreła admovu pracadaŭcaŭ. Lidar asacyjacyi pracadaŭcaŭ mietałurhičnaj pramysłovaści zajaviŭ, što takoje pahadnieńnie «pryviało b da praźmiernaha rostu vydatkaŭ» i, takim čynam, «da paharšeńnia kankurentnaj pazicyi».
Pavodle apytańnia, hramadzianie Uschodniaj Hiermanii nastrojenyja asabliva skieptyčna: 62% ź ich nie ličać, što ŭviadzieńnie čatyrochdzionnaha tydnia maje sens. U Zachodniaj Hiermanii kolkaść praciŭnikaŭ składaje 54%.
Čatyrochdzionny tydzień asabliva papularny siarod prychilnikaŭ zialonych: 69% ź ich vystupili za ŭviadzieńnie i 29% — suprać. Siarod prychilnikaŭ SDPH takuju prapanovu padtrymali 43%. Suprać vykazvajucca 53%.
Jak ni dziŭna, ale mienš za ŭsio hetaja madel znajšła padtrymku ŭ libierałaŭ: za jaje vykazalisia 24%, suprać — 76%.
U Hiermanii čatyrochdzionny pracoŭny tydzień u roznych varyjantach praktykujecca asobnymi pracadaŭcami. Najbolš raspaŭsiudžanaja praktyka padaŭžeńnia pracoŭnaha dnia. Kab mieć dadatkovy vychadny, zamiest 8 hadzin davodzicca pracavać 10. U toj ža čas isnujuć pracadaŭcy, jakija iduć na skaračeńnie kolkaści pracoŭnych hadzin na tydzień pry zachavańni zarobku.
Čytajcie jašče:
Raspaviadajem, jak zrabić pracoŭny dzień lepšym. Pasprabujcie, kali vy pracujecie z ofisa abo doma!
Čatyrochdzionny pracoŭny tydzień: čamu ŭsio bolš kampanij iduć na hety niestandartny krok
Čatyrochdzionny pracoŭny tydzień. U kožnaj krainie svaje asablivaści